كۇنى بويى وتىرىپ ىستەيتىن جۇمىستىڭ سالدارىن جويۋ ءۇشىن نە ىستەۋ كەرەك؟ - مامان كەڭەسى

كۇنى بويى كەڭسەدە وتىرىپ جۇمىس ىستەۋدىڭ ءوز زيانى بار، بۇل ەڭ الدىمەن ومىرتقاعا ۇلكەن جۇك تۇسىرەدى. الايدا كەڭسەدە ۇزاق ۋاقىت وتىرۋدىڭ سالدارىن جويۋعا بولادى. ق ر پرەزيدەنتى ءىس باسقارماسى مەديتسينالىق ورتالىعى باسشىسىنىڭ ورىنباسارى ليۋدميلا بيۋرابەكوۆا وڭتايلى ادىستەرمەن ءبولىستى، دەپ حابارلايدى Kazinform.

ساراپشىنىڭ پىكىرىنشە، كەڭسەدە كۇنىنە 7-8 ساعات تاپجىلماستان وتىرۋ بۇلشىقەتتىڭ بوساڭسۋىنا، قان تامىرلارىنىڭ قىسىلۋىنا اكەلۋى مۇمكىن. سونىمەن قاتار ومىرتقا وزگەرىپ، ول باس اۋرۋى مەن بۋىن اۋرۋلارىنا، تىنىس الۋدىڭ قيىنداۋىنا الىپ كەلەتىن جاعدايلار بار.

«عىلىمي زەرتتەۋلەر بارىسىندا كۇنىنە 30-40 مينۋت بەلسەندى بولۋ، جاتتىعۋ جاساپ، ءبىر مەزگىل ءجۇرۋ وتىرىپ ىستەيتىن جۇمىستىڭ زيانىن ەداۋىر تومەندەتەتىنى انىقتالدى. عالىمداردىڭ تالداۋىنا سۇيەنسەك، فيزيكالىق بەلسەندىلىگى تومەن ادامدار اراسىندا مەزگىلسىز ءولىم كوبەيگەن. ال كۇنىنە كەم دەگەندە جارتى ساعاتقا قيمىل- قوزعالىس جاساۋ كۇنى بويى وتىرۋعا بايلانىستى بولۋى مۇمكىن اۋرۋلاردىڭ قاۋپىن ايتارلىقتاي تومەندەتەدى»، - دەپ جازدى ليۋدميلا بيۋرابەكوۆا ءوزىنىڭ Facebook-تەگى پاراقشاسىندا.

ساراپشى كۇندەلىكتى ومىردە وڭاي قولدانۋعا بولاتىن قاراپايىم ارەكەتتەرگە مىسال كەلتىردى:

تاڭەرتەڭگىلىك جاتتىعۋلار: كۇن سايىن 15 مينۋتتىق جاتتىعۋ دەنەگە قۋات بەرىپ، كوڭىل كۇيدى جاقسارتۋعا، قان قىسىمىن قالىپقا كەلتىرۋگە جانە مەتابوليزمدى جىلدامداتۋعا كومەكتەسەدى.

جاياۋ سەرۋەندەۋ: كولىكتى جۇمىس ورنىنان الىستاۋ قويۋ، كۇندىز بىرنەشە رەت از ۋاقىتقا سەرۋەندەۋ شارشاۋدى، مازاسىزدىقتى، كۇيزەلىستى ازايتۋعا جانە تابەتتى باسۋعا كومەكتەسەدى.

جۇمىستاعى بەلسەندىلىك: ورىندىقتان تۇرىڭىز، ليفتتىڭ ورنىنا باسپالداقتى پايدالانىڭىز، ەلەكتروندى پوشتانىڭ ورنىنا ارىپتەستەرىڭىزبەن بەتپە- بەت سويلەسىڭىز.

كۇلىمسىرەۋ: بەت بۇلشىقەتتەرىن ۇنەمى جاتتىقتىرۋ جاعىمدى ەموتسيالار بەرىپ قانا قويماي، سونىمەن قاتار سترەستى ازايتادى، كاسىبي جەتىستىكتەرگە جەتەلەيدى.

اۆتور

اقەركە داۋرەنبەك قىزى