كۇننىڭ ىستىعىنان فرانسيالىق تۋريست بايقوڭىر عارىش ايلاعىنا بارا جاتقان جولدا قايتىس بولدى

استانا. KAZINFORM - قايعىلى وقيعا بايقوڭىر قالاسىنىڭ ماڭىندا بولعان. بۇل تۋرالى رەسەيلىك 112 Telegram ارناسى جازدى.

بەلگىلى بولعانداي، بىرنەشە كۇن بۇرىن 27 جاستاعى نيكولاس كاربون مەن 25 جاستاعى اندجەلو الەبەتتا پاريجدەن الماتىعا كەلگەن. سودان سوڭ عارىش ايلاعى مەن «بۋراندى» كورۋ ءۇشىن بايقوڭىرعا اتتانعان.

ەكى تۋريست تىيىم سالىنعان ايماققا جاياۋ جەتۋدى ۇيعارىپ، كۇننىڭ ىستىعىندا كوپ كۇش جوعالتقان. سونىڭ سالدارىنان اندجەلونىڭ مۇرنىنان قان كەتىپ، اقىرى ول ەسىنەن تانىپ قۇلاپ قالادى. سول ۋاقىتتا نيكولاس «سامارا - شىمكەنت» تاسجولىنا جۇگىرىپ بارىپ، قازاقستاندىق پوليتسەيلەردى كومەككە شاقىرادى. ءبىراق دوسىنىڭ ءحالىن تۇسىندىرە الماعان. پوليتسەيلەر ءتۋريستى عارىش ايلاعىنىڭ وتكىزۋ پۋنكتىنە جەتكىزىپ، زارداپ شەگۋشىنى ىزدەۋگە كىرىسەدى.

اندجەلونى كەزىكتىرگەندە ونىڭ ءولى كۇيىندە جاتقانىن اڭعارعان. مارقۇمنىڭ دەنەسىنەن زورلىق- زومبىلىق بەلگىلەرى تابىلماعان. قازىرگى كەزدە تەرگەۋ امالدارى ءجۇرىپ جاتىر.

بايقوڭىر قالاسىنىڭ اكىمشىلىگى، سونداي- اق ق ر پرەزيدەنتىنىڭ «بايقوڭىر» كەشەنىندەگى ارنايى وكىلىنىڭ كەڭسەسى مۇنداي تۋريستەر قالاعا جانە عارىش ايلاعىنا بارۋ تۋرالى رەسمي تۇردە ءوتىنىش بەرمەگەنىن راستادى. وسى ەكسترەمالدى تۋريستىك وقيعانىڭ قايعىلى وقيعاسى تۋرالى تولىعىراق روسكوسموس نەمەسە وقيعا ايماعىنا جاۋاپتى ماسكەۋ وبلىسىنىڭ ىشكى ىستەر باسقارماسى بايانداپ بەرە الادى.