كەننەديگە جاسالعان قاستاندىق تۋرالى ۆيدەو اۋكسيونعا قويىلادى

استانا. KAZINFORM - امەريكا قۇراما شتاتتارىنىڭ 35- پرەزيدەنتى دجون كەننەديدىڭ قاستاندىقتان كەيىن اۋرۋحاناعا بارا جاتقان كورتەجىنىڭ جاڭا ۆيدەوسى بوستونداعى (ماسساچۋسەتس شتاتى) RR Auction اۋكسيونىندا ساتىلادى.

بۇل تۋرالى People باسىلىمى حابارلادى.

باسىلىمنىڭ مالىمەتىنشە، اۋكسيون 28 -قىركۇيەكتە وتەدى. ۆيدەودا پاركلەند اۋرۋحاناسىنا قاراي اسىعىپ كەلە جاتقان كورتەجدى كورۋگە بولادى. ونىڭ اۆتورى داللاس قالاسى تۇرعىنى (تەحاس شتاتى) دەيل كارپەنتەر ەدى. ول قايتىس بولعاننان كەيىن بەينە نەمەرەسى دجەيمس گەيتسكە قالدىرىلعان.

«پلەنكا پلاستيك ءسۇت قوراپشاسىندا ساقتالدى. ول مەنىڭ شكافىمدا بىرنەشە جىل تۇردى»، - دەيدى گەيتس.

RR Auctions اتقارۋشى ۆيتسە- پرەزيدەنتى بوببي ليۆينگستوننىڭ ايتۋىنشا، بۇل كادرلاردا «زاپرۋدەر فيلمىندە» تۇسىرىلگەن وقيعالاردان كەيىنگى ساتتەر بەينەلەنگەن.

ايتا كەتەيىك، كەننەديگە جاسالعان قاستاندىق تۋرالى 26 سەكۋندتىق ۆيدەو ا ق ش- تا «زاپرۋدەر فيلمى» دەگەن اتپەن تانىمال، سەبەبى ونى كوپشىلىك اراسىندا كينوكامەرامەن بولعان اۆراام زاپرۋدەر تۇسىرگەن. بۇل 486 كادرلىق فيلم بۇرىنعى پرەزيدەنتتىڭ ءولىمىن بەينەلەيدى.

امەريكا قۇراما شتاتتارىنىڭ 35- پرەزيدەنتى كەننەديگە 1963 -جىلى 22 -قاراشادا تەحاسقا سايلاۋالدى ساپارى كەزىندە داللاستا قاستاندىق جاسالدى. قىلمىستان كەيىن قۇرىلعان رەسمي كوميسسيا بۇل لي حارۆي وسۆالدتىڭ ءىسى دەگەن قورىتىندىعا كەلگەن. كوميسسيا قورىتىندىسىنا سايكەس، وق داللاستىڭ ورتالىق الاڭىندا ورنالاسقان مەكتەپ وقۋلىقتارى قويماسىنىڭ التىنشى قاباتىنان اتىلعان. ول جەردەن تەلەسكوپتىق كوزدەۋىشى بار مىلتىق پەن پايدالانىلعان پاتروندار تابىلعان.

اۆتور

جاراسقان نۇرىبايەۆ