كۇن ساۋلەسىندە بەس كۇشتى جارقىل بولدى

  استانا. KAZINFORM - عالىمدار 14-شىلدەدە كۇن ساۋلەسىندە بەس قۋاتتى تۇتانۋدى تىركەدى، ولاردىڭ ءبىرى ەڭ جوعارى X كلاستى بولعان، دەپ حابارلادى تاسس اقپارات اگەنتتىگى.

«14-شىلدە كۇنى ماسكەۋ ۋاقىتىمەن ساعات 05:34 تە (استانا ۋاقىتىمەن 07:34) رەنتگەن دياپازونى 3738 (S12W39) داقتار توبىندا ۇزاقتىعى 29 مينۋت بولعان X 1.3 تۇتانۋ تىركەلدى»، - دەپ حابارلادى قولدانبالى گەوفيزيكا ينستيتۋتى.

سونىمەن قاتار جەكسەنبىگە قاراعان ءتۇنى م5.0، م2.7، م1.7، ال تاڭەرتەڭ م3.0 تۇتانۋ بولدى.

تۇتانعاننان كەيىن كۇن رەنتگەندىك جارقىلدارىنىڭ جەردىڭ يونوسفەراسىنا اسەر ەتۋ دەڭگەيى عارىشتىق اۋا رايى دەرەكتەرى بويىنشا بەس ينديكاتورلىق شكالا بويىنشا R3 (كۇشتى) دەڭگەيىندە بولدى، مۇندا ەڭ جوعارىسى - R5 (توتەنشە). قازىرگى ۋاقىتتا عارىشتىق اۋا رايى مونيتورينگى دەرەكتەرىنە سايكەس، R شكالاسى بويىنشا دەڭگەي تىنىشتىقتى كورسەتەدى.

رەنتگەن ساۋلەلەنۋىنىڭ قۋاتىنا بايلانىستى كۇن تۇتانۋى بەس كلاسقا بولىنەدى: A، B، C، M جانە X. ەڭ تومەنى - A0.0 كلاسى جەر وربيتاسىنداعى 1 شارشى مەتردە 10 نۆت ساۋلەلەنۋ قۋاتىنا سايكەس كەلەدى. كەلەسى ارىپكە وتكەندە قۋات 10 ەسە ارتادى. ادەتتە تۇتانۋلار كۇن پلازماسىنىڭ شىعارىندىلارىمەن بىرگە جۇرەدى. ولاردىڭ بۇلتتارى جەرگە جەتىپ، ماگنيتتىك داۋىلداردى تۋدىرۋى مۇمكىن.