كۇن قايتادان كۇرت سۋىتادى

الماتى. KAZINFORM - قازگيدرومەت 17، 18 جانە 19-مامىرعا ارنالعان اۋا رايى بولجامىن جاريالادى.

اتموسفەرالىق فرونتتار وتۋىنە بايلانىستى رەسپۋبليكا بويىنشا جاڭبىر جاۋىپ، نايزاعاي ويناپ، بۇرشاق تا جاۋۋى مۇمكىن، ەكپىندى جەل سوعىپ، داۋىل تۇرادى. تەك 17-18-مامىردا باتىس قازاقستان، 17-مامىردا قاراعاندى، اباي، شىعىس قازاقستان وبلىستارىندا جاۋىن-شاشىنسىز اۋا رايى بولادى.

17-مامىردا ماڭعىستاۋ، قىزىلوردا وبلىستارىندا، 17-18-مامىردا اقتوبە، قوستاناي، اقمولا، سولتۇستىك قازاقستان وبلىستارىندا، 18-مامىردا ۇلىتاۋ، تۇركىستان وبلىستارىندا، 18-19-مامىردا پاۆلودار، قاراعاندى، الماتى، جەتىسۋ وبلىستارىندا، 19-مامىردا باتىس قازاقستان، شىعىس قازاقستان جانە اباي، جامبىل وبلىستارىندا قاتتى جاڭبىر مەن بۇرشاق جاۋادى.

ەلىمىزدىڭ وڭتۇستىگى مەن وڭتۇستىك-شىعىسىندا شاڭدى داۋىل سوعادى. 17-18-مامىردا باتىس جانە سولتۇستىك وڭىرلەردە تۇمان ءتۇسۋى ىقتيمال.