كەمەل توقايەۆ - دەتەكتيۆ جانرىنىڭ اتاسى عانا ەمەس، قازاقتان شىققان تۇڭعىش كينوسىنشى

كەمەل توقايەۆ قازاق ادەبيەتىندەگى دەتەكتيۆ جانرىنىڭ عانا جامپوزى ەمەس، قازاق كينورەتسەنزياسىنىڭ دا العاشقى قارلىعاشى.

بۇل تۋرالى «قازاقپارات» تىلشىسىنە جازۋشى، جۋرناليست، قازاقستاننىڭ ەڭبەك سىڭىرگەن قايراتكەرى كوسەمالى ءساتتىباي ۇلى ايتتى.

كەمەل توقايەۆتىڭ شىعارماشىلىعى مەن ءومىربايانىن زەرتتەپ جۇرگەن جازۋشى، جۋرناليست كوسەمالى ءساتتىباي ۇلىنىڭ ايتۋىنشا، قازاق دەتەكتيۆ جانرىنىڭ دارابوزى ەڭبەك جولىن جامبىل وبلىستىق «ستاليندىك جول» گازەتىندە باستاعان ەكەن.

«جازۋعا كىرىسپەس بۇرىن كەمەل اعانىڭ ءومىربايانىنا ءۇڭىلدىم. ارحيۆتەردەن ىزدەدىم. ءبىز تانىسقان ءومىرباياندا ول كىسى ەڭبەك جولىن «لەنينشىل جاس» گازەتىنەن باستاعان دەپ جازىلعان. ءبىراق قالامگەردىڭ 1948-جىلى جامبىل وبلىستىق «ستاليندىك جول» گازەتىندە دە ءتىلشى بوپ ەڭبەك ەتكەنى تۋرالى دەرەكتى تاپتىم. ىزدەگەنىم دە وسى بولاتىن»، - دەيدى كوسەمالى ءساتتىباي ۇلى.

سونىمەن قاتار، جۋرناليست كەمەل توقايەۆتىڭ قازاق ادەبيەتىندەگى دەتەكتيۆ جانرىنىڭ عانا جامپوزى ەمەس، قازاق كينورەتسەنزياسىنىڭ دا العاشقى قارلىعاشى ەكەنىن جەتكىزدى.

«كەمەل توقايەۆتىڭ «جاس گۆارديا» دەپ اتالاتىن كينورەتسەنزياسى ءبىز ايتىپ وتىرعان گازەتتىڭ 1948-جىلعى 24- قازانداعى نومىرىنە (213№ (2524) جاريالانىپتى. جاس جۋرناليستەر بىردەن كينورەتسەنزياعا بارمايدى. ال، كەمەل توقايەۆ ءبىر جىلدىڭ ىشىندە اۋقىمدى ءۇش كينورەتسەنزيا جازعان. اتاپ ايتار بولسام، الەكساندر فادەيەۆتىڭ رومانى بويىنشا تۇسىرىلگەن «جاس گۆارديا»، «الىستاعى قالىڭدىق» جانە «ءسىبىر جەرى تۋرالى اڭىز» كينوسى. بولاشاق جازۋشى ءوزىن كوركەم تۋىندىعا جەتەلەيتىن جولدى سول كەزدە-اق تاپقان سياقتى. سونىمەن بىرگە، ءبىز ونى قازاق ادەبيەتىندەگى دەتەكتيۆ جانرىنىڭ عانا جامپوزى ەمەس، قازاق كينورەتسەنزياسىنىڭ دا العاشقى قارلىعاشى دەپ ايتا الامىز. ول جىلدارى قازاق كينو ونەرى ءالى دامىماعان بولاتىن. سوندىقتان، بۇل كىسى دەتەكتيۆ جانرىنىڭ اتاسى عانا ەمەس، قازاق كينو ونەرىندەگى تۇڭعىش كينوسىنشى. دەرەك پەن دايەك وسىنىڭ دالەلى»، - دەدى كوسەمالى ءساتتىباي ۇلى.