كەلتىرىلگەن زالال وتەلدى: قايرات ساتىبالدى بوستاندىققا شىعادى

استانا. KAZINFORM - وسكەمەن قالالىق №2 سوتى قايرات ساتىبالدىنىڭ جازانىڭ وتەلمەگەن بولىگىن نەعۇرلىم جەڭىل جازاعا اۋىستىرۋ تۋرالى ءوتىنىشىن قارادى. بۇل تۋرالى سوتتىڭ باسپا ءسوز قىزمەتىنەن ءمالىم بولدى.

سوت ۇكىمىمەن ساتىبالدى سەنىپ تاپسىرىلعاننىڭ مۇلكىن جىمقىرۋ، ۇرلىق جاساۋ ماقساتىنسىز زالال كەلتىرۋ بويىنشا مۇلكى تاركىلەنىپ، مەملەكەتتىك قىزمەت اتقارۋ قۇقىعىنان 10 جىلعا دەيىنگى مەرزىمگە ايىرا وتىرىپ، 6 جىلعا باس بوستاندىعىنان ايىرۋ جازاسىنا سوتتالعان.

ول ءوزىنىڭ ءوتىنىشحاتىندا جازاسىنىڭ وتەلمەگەن بولىگىن نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن بەرۋ ءۇشىن زاڭنىڭ بارلىق تالاپتارىن ورىنداعانىن اتاپ كورسەتكەن.

«سوتتالعان ءوتىنىشحاتىن قولداپ، ونى قاناعاتتاندىرۋدى سۇرادى. نەگىز رەتىندە ءوزىنىڭ وڭ مىنەزدەمەسىن، ۇكىم بويىنشا زالالدىڭ ورنىن تولتىرعانىن، سونداي-اق جالپى سوماسى 700 ميلليارد تەڭگەدەن استام مۇلىكتى جانە وزگە دە قاراجاتتى ءوز ەركىمەن مەملەكەتكە قايتارعانىن ايتتى. تۇزەۋ مەكەمەسىنىڭ وكىلى سوتتالۋشىنىڭ ءوتىنىشحاتىن قولدادى.

پروكۋرور دا ساتىبالدىنىڭ ءوتىنىشحاتىن قاناعاتتاندىرۋدى سۇراپ، ونىڭ جازانى اۋىستىرۋ ءۇشىن بارلىق شارتتاردى ورىنداعانىن، سونداي-اق مەملەكەتكە ءوز ەركىمەن وزگە دە مۇلىكتى بەرگەنىمەن نەگىزدەدى»، - دەلىنگەن سوت اقپاراتىندا.

اتاپ ايتقاندا، ق ك- ءنىڭ 73-بابى اۋىرلىعى ورتاشا قىلمىستار نەمەسە اۋىر قىلمىستار ءۇشىن سوتتالعان ادامدى جازانىڭ وتەلمەگەن بولىگىنىڭ قالعان بولىگىن مىناداي جاعدايلاردا نەعۇرلىم جەڭىل جازا تۇرىمەن الماستىرۋ مۇمكىندىگىن كوزدەيدى:

- جازا مەرزىمىنىڭ كەمىندە 1/3 بولىگىن وتەگەننەن كەيىن؛

- كەلتىرىلگەن زالال تولىق وتەلگەن جاعدايدا؛

- جازانى وتەۋ ءتارتىبىن قاساقانا بۇزۋ جاعدايلارىنىڭ بولماۋى.

ساتىبالدى ورتاشا اۋىر قىلمىس جانە اۋىر قىلمىس جاساعان. ول جازانىڭ 1/3 بولىگىنەن استامىن وتەگەن. تۇزەۋ مەكەمەسىنىڭ اكىمشىلىگى سوتتالعانعا قاتىستى وڭ سيپاتتاماسىن بەرگەن

«قىلمىسپەن كەلتىرىلگەن زالال تولىعىمەن وتەلگەن. سوت ۇكىمىمەن ءوندىرىپ الىنعان سومالار (ءىس جۇرگىزۋ شىعىندارى، ءماجبۇرلى تولەم) تولەنگەن.

جوعارىدا ايتىلعانداردىڭ نەگىزىندە سوت سوتتالۋشىنىڭ ءوتىنىشحاتىن قاناعاتتاندىردى جانە باس بوستاندىعىنان ايىرۋ تۇرىندەگى جازانىڭ وتەلمەگەن بولىگىن 3 جىل 3 اي 7 كۇن مەرزىمگە باس بوستاندىعىن شەكتەۋگە اۋىستىردى»، - دەپ اتالىپ وتكەن سوت اقپاراتىندا.

ق. ساتىبالدىعا پروباتسيالىق باقىلاۋ بەلگىلەندى. تۇراقتى جۇمىسى بولماعان جاعدايدا، سوتتالعان جازانى وتەۋدىڭ بارلىق مەرزىمى ىشىندە جىل سايىن 100 ساعاتتان ءماجبۇرلى ەڭبەككە تارتىلادى.

سوت قاۋلىسىمەن وعان مىناداي مىندەتتەر جۇكتەلگەن:

- سوتتىڭ قاۋلىسى تۇرعىلىقتى جەرى بويىنشا پروباتسيا قىزمەتىنە زاڭدى كۇشىنە ەنگەن كۇننەن باستاپ 10 كۇن ىشىندە ەسەپكە قويۋ ءۇشىن كەلۋ، سوتتالعان ادامنىڭ (پروباتسيا قىزمەتىنىڭ) مىنەز- قۇلقىن باقىلاۋدى جۇزەگە اسىراتىن ۋاكىلەتتى مەملەكەتتىك ورگاندى حاباردار ەتپەي تۇراقتى تۇرعىلىقتى جەرىن، جۇمىسىن، وقۋىن اۋىستىرماۋ، باسقا دا مىندەتتەردى ورىنداۋ سوتتالعاندى تۇزەۋگە جانە ونىڭ جاڭا قىلمىستىق قۇقىق بۇزۋشىلىقتار جاساۋىنىڭ الدىن الۋعا ىقپال ەتەدى.

سوت قاۋلىسى زاڭدى كۇشىنە ەنگەن جوق.

اۆتور

رۋسلان عابباسوۆ