كەلەسى جىلى ەلدەگى 99 بازار جاڭعىرتۋدان وتەدى

استانا. KAZINFORM - ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ادىلبەكوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا كەلەر جىلى ەلدەگى 99 بازار جاڭعىرتىلاتىنىن ايتتى.

«جىل باسىنان بەرى ساۋدا بازارلارىنىڭ جاي-كۇيىن باعالاۋ ەلىمىزدىڭ بارلىق وڭىرلەرىنە بارىپ ەگجەي-تەگجەي تۇگەندەۋ جۇمىسى جۇرگىزىلدى. بۇل جۇمىستى ءبىز اكىمدىكتەرمەن، مەملەكەتتىك كىرىستەر، توتەنشە جاعدايلار، مەملەكەتتىك ساۋلەت-قۇرىلىس باقىلاۋى، سانيتارلىق-ەپيدەميولوگيالىق باقىلاۋ وكىلدەرىمەن بىرلەسىپ جۇرگىزدىك. وڭىرلىك ساپارلاردىڭ قورىتىندىسى بويىنشا ساۋدا بازارلارىن جاڭعىرتۋ جونىندەگى جول كارتاسىن وزەكتەندىردىك. وسىلايشا، وزەكتەندىرىلگەن 2024-2025 -جىلدارعا ارنالعان جول كارتاسىنا سايكەس 115 بازاردى جاڭعىرتۋ جوسپارلانعان»، - دەدى ول.

كوميتەت باسشىسىنىڭ ايتۋنىشا، بيىل 16 بازاردا جاڭعىرتۋ جۇمىستارى اياقتالۋى كەرەك.

«ونىڭ ىشىندە الماتىداعى «ساۋران»، «سارى ارقا»، «ساۋدا كەنت»، «تيگروحاۋد»، «كەنجەحان-1» جانە «كەنجەحان 2» بازارلارى بار. جىل سوڭىنا دەيىن شىمكەنت قالاسىندا 3 بازار، الماتى وبلىسىندا 1، جامبىل وبلىسىندا 2، قوستاناي جانە ۇلىتاۋ وبلىستارىندا 1 بازار، تۇركىستان وبلىسىندا 2 ساۋدا بازارى جاڭارتىلادى. ال كەلەسى 2025 -جىلى 99 بازاردى جاڭعىرتۋ جوسپارلانعان»، - دەدى ايدار ادىلبەكوۆ.

اۆتور

ەسىمجان ناقتىباي