كەلەسى جىلى كوكتەمدە ەگىس ەگەتىن فەرمەرلەرگە قارجى بيىل بەرىلە باستايدى

قوستاناي. KAZINFORM - ۆيتسە-پرەمەر سەرىك جۇمانعارين قوستاناي وبلىسىنىڭ فەرمەرلەرىمەن پرەمەر-مينيستر ولجاس بەكتەنوۆتىڭ بيىلعى 23-قىركۇيەكتە قازاقستاندىق ديقاندارمەن وتكىزگەن كەڭەيتىلگەن فورماتتاعى كەزدەسۋىندە كوتەرىلگەن ماسەلەلەردى تالقىلادى.

«ۇكىمەت باسشىلىعىمەن وتكىزىلگەن كەڭەس - مەملەكەت باسشىسىنىڭ ەلىمىزدىڭ اۋىل شارۋاشىلىعىن قولداۋ جانە دامىتۋ جونىندەگى تاپسىرمالارىنا جىلدام جاۋاپ. ءبىز فەرمەرلەردى قولداۋ كولەمىن بىرتىندەپ ارتتىرىپ جاتىرمىز. اتاپ ايتقاندا، كوكتەمگى-كۇزگى دالا جۇمىستارىنا جەڭىلدىگى بار قارجىلاندىرۋ كولەمىن 700 ميلليارد تەڭگەگە دەيىن ۇلعايتامىز، ونىڭ شامامەن @ «دامۋ» قورى ارقىلى كەپىلدەندىرىلەدى. اۋىل شارۋاشىلىعى تەحنيكاسىن ليزينگكە كرەديتتەۋ كولەمى 100 ميلليارد تەڭگەدەن 200 ميلليارد تەڭگەگە دەيىن وسەدى. ناتيجەسىندە جىل سايىنعى جۇمىستاردى قامتاماسىز ەتۋ ءۇشىن فەرمەرلەردى قولداۋ سوماسى 900 ميلليارد تەڭگەگە دەيىن ۇلعايادى. بيىل ءبىز 2025-جىلعى كوكتەمگى ەگىس جۇمىستارىن قارجىلاندىرۋدى باستايمىز»، - دەدى سەرىك جۇمانعارين فەرمەرلەرگە.

ۆيتسە-پرەمەر وڭىرلەردە فەرمەرلەر جاڭا جىلدىڭ باسىندا كوپتەگەن قاجەتتى تاۋارلاردىڭ باعاسى وسەتىنىن، سوندىقتان «كەندالا» باعدارلاماسى بويىنشا كوكتەمگى جۇمىستارعا قول جەتىمدى قاراجاتتى كۇزدە العان ءجون ەكەنىن ايتقانىن جەتكىزدى.

«بيىلعى قاراشا-جەلتوقسان ايلارىندا ءبىز بۇل پروتسەستى باستايمىز. ۇلكەن جوبا بويىنشا جەڭىلدىگى بار قارجىلاندىرۋ كولەمىن كەلەسى جىلعا جىلدىق %2,5 مولشەرلەمەمەن 100 ميلليارد تەڭگەدەن 200 ميلليارد تەڭگەگە دەيىن ۇلعايتىپ، نەسيەلەۋ ءۇشىن تاعى 8 جاڭا باعىت قوسامىز. بۇل - ەتتى مال شارۋاشىلىعى، ونەركاسىپتىك جىلىجاي كەشەندەرى، جەمىس ساقتاۋ قويمالارى، بالىق وسىرەتىن بالىق وڭدەۋ شارۋاشىلىقتارى، وراۋ ءوندىرىسى، تەرەڭ وڭدەۋ جانە باسقالارى»، - دەپ ناقتىلادى سەرىك جۇمانعارين.

ەكىنشى دەڭگەيدەگى بانكتەر مەن باسقا دا قارجى ينستيتۋتتارىنىڭ جەڭىلدىگى بار قارجىلاندىرۋىن، سونداي-اق اينالىم جانە ينۆەستيتسيالىق قاراجات تۇرىندەگى قولداۋلاردى قوسقاندا، مەملەكەتتىك قولداۋ كولەمى 1,3-1,4 تريلليون تەڭگەگە دەيىن جەتكىزىلەتىن بولادى.

پرەمەر-ءمينيستردىڭ ورىنباسارى سونداي-اق حاركوۆسكوە اۋىلىنىڭ تۇرعىندارىمەن كەزدەستى، «تەررا» شارۋا قوجالىعىنىڭ ەگىس القابىندا كوكونىس جيناۋ بارىسىمەن جانە ءونىمدى ساقتاۋ ورىندارىنىڭ مۇمكىندىگىمەن تانىستى جانە قوستانايلىق جىلقى تۇقىمىن وسىرۋمەن اينالىساتىن «قازاق تۇلپارى» ج ش س- دا بولدى.