كەلەسى جىلى جاڭا باستامالار ۇسىنامىن - قاسىم-جومارت توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا ەلدەگى رەفورمالار ءالى اياقتالماعانىن ەسكە سالدى.
«ءبىز ءاربىر وزگەرىستى مۇقيات ويلاستىرا وتىرىپ جۇزەگە اسىرۋىمىز كەرەك. باستامالاردىڭ اقىلعا قونىمدى جانە قازىرگى احۋالعا ساي بولعانى ماڭىزدى. بۇرىنعى جوسپاردىڭ ءبارىن قازىرگى كۇننىڭ تالابىنا لايىقتاپ، تۇزەتۋ قاجەت. مەن بۇعان دەيىن رەفورمالار توقتاپ قالمايتىنىن ناقتى ايتتىم. ويتكەنى ەلىمىزدى جان-جاقتى جاڭعىرتۋ ءىسى ۇزدىكسىز جالعاسا بەرۋگە ءتيىس»، - دەدى پرەزيدەنت.
مەملەكەت باسشىسى الدا اۋقىمدى جۇمىس تۇرعانىن ايتادى.
«سوعان ساي جاڭا باستامالار مەن جوسپارلاردى جۇزەگە اسىرامىز. قازىر ونىڭ ءبارى مۇقيات زەردەلەنىپ جاتىر. كەلەسى جىلى حالىققا ۇسىناتىن بولامىن. كەيبىر باستامانى ادەتتەگىدەي ۇلتتىق قۇرىلتايدا جاريالايمىن. ونىڭ كەزەكتى وتىرىسى بۋرابايدا وتەدى. قالعانىن جولداۋدا ايتامىن»، - دەدى قاسىم-جومارت توقايەۆ.
اۆتور
ەسىمجان ناقتىباي