كەلەسى جىلدىڭ باسى قىسقى ازيادا ويىندارىمەن باستالادى

استانا. KAZINFORM - كەلەسى جىلدىڭ سپورتتىق كۇنتىزبەسى ءىرى كەشەندى جارىسپەن باستالادى. 2025-جىلى قىسقى ازيا ويىندارىنىڭ جالاۋى جەلبىرەيدى. بۇل باسەكە قىتايدىڭ حاربين قالاسىندا وتپەك.

ق ر ۇلتتىق وليمپيادالىق كوميتەتى اتاپ وتكەندەي، قىسقى ازيادا 2025 -جىلدىڭ 7-14-اقپانى ارالىعىندا وتەدى.

قىسقى ازيا ويىندارى العاش رەت 1986 -جىلى ۇيىمداستىرىلدى. سول كەزدە جاپونيانىڭ ساپپورو قالاسى قۇرلىق ەلدەرىنىڭ باسىن قوسقان بولاتىن. تۇڭعىش رەت وتكەن قىسقى ازياداعا بار بولعانى جەتى مەملەكەتتىڭ وكىلى قاتىستى. الايدا، ۋاقىت وتە كەلە قۇرلىقتىڭ كىشى وليمپياداسىندا باق سىنايتىن ەلدەر قاتارى كوبەيىپ، ازيادا جارىس كۇنتىزبەسىندەگى ماڭىزدى دودالاردىڭ بىرىنە اينالدى.

قىسقى ازيا ويىندارىن ەڭ كوپ قابىلداعان مەملەكەت - جاپونيا. كۇنشىعىس ەلىندە قۇرلىق باسەكەسى ءتورت رەت وتكىزىلگەن. ال قىتاي ءىرى سپورتتىق جارىستى ءوز جەرىندە ءۇشىنشى رەت قابىلداماق. ناقتىلاي تۇسەر بولساق، قىسقى ازيادا حاربين تورىندە ەكىنشى رەت وتكىزىلمەك (ءبىر رەت ويىندار چاڭشۇندە ۇيىمداستىرىلعان).

2011 -جىلى اق ازيادانى قازاقستاننىڭ قابىلداعانى بەلگىلى. جارىستىڭ جارتىسى استانادا ءوتتى. اتاپ ايتار بولساق، مانەرلەپ سىرعاناۋ، شايبالى حوككەيدەن ەرلەر دوداسى، كونكيمەن جۇگىرۋ جانە شورت-ترەك ەلوردا تورىندە ۇيىمداستىرىلدى. قالعان سپورت تۇرلەرىندەگى جەڭىمپازدار الماتى تورىندە انىقتالدى.

سوڭعى ازيا ويىندارى 2017 -جىلى جاپونيانىڭ ساپپورو قالاسىندا ءوتتى. ال حاربين اراعا 29 جىل سالىپ، قىسقى ازيادانى قايتادان قابىلداماق. ايتا كەتەلىك، قىتايلىق قالادا ازيادا سوناۋ 1996 -جىلى وتكىزىلدى. قازىرگى تاڭدا الداعى جارىستىڭ باستى اتريبۋتتارى انىقتالدى.

بويتۇمار «جارىپ ءوتۋ» دەگەن اتاۋدى العان. بويتۇماردىڭ ەسكيزى شورت-ترەكتە سىنعا تۇسەتىن سپورتشىنىڭ قيمىلدارى ارقىلى جاسالدى. سونداي-اق، حاربيندەگى قالالىق گۇل - سيرەن مەن ورالعان لەنتانىڭ بەينەسى دە بار. ازيا ويىندارى اتاۋىنىڭ قىسقارعان نۇسقاسى مەن ازيا وليمپيادا كەڭەسىنىڭ سيمۆولى دا بويتۇمار ەلەمەنتىنە اينالعان.

2025 -جىلعى ازيادانىڭ بويتۇمارلارى - سىبىرلىك جولبارىستار بينبين مەن نيني. ۇرانى: «ازياداعى قىسقى ارمان مەن ماحاببات». ازيادانىڭ سالتاناتتى بولىگى مەن جارىستار جەتى سپورت نىسانىندا وتەدى. ولاردىڭ قاتارىندا حاربين حوككەي ارەناسى، حالىقارالىق حاربين كونگرەسس-كورمە جانە سپورت ورتالىعى، حاربيندەگى پينفان اۋدانىنىڭ حوككەي ارەناسى، حاربين سپورتتىق ۋنيۆەرسيتەتىنىڭ ستۋدەنتتىك مۇزايدىنى، حيلۇڭجياڭ جاتتىعۋ ورتالىعىنىڭ مۇزداعى جارىستارعا ارنالعان كوپ فۋنكتسيونالدى زالى، حيلۇڭجياڭ وقۋ ورتالىعىنىڭ مۇزداعى جارىستارعا ارنالعان زالى، يابۋلي تاۋ-شاڭعى كۋرورتى.

بۇگىندە سپورتتىق نىساندار سوڭعى دايىندىقتى وتكەرىپ جاتىر. بيىلعى شىلدەدە ازيادانىڭ باستالۋىنا 200 كۇن قالعانىنا وراي سالتاناتتى مەرەكەلىك شارا ۇيىمداستىرىلدى. جالپى العاندا، حاربيندە 131 بۇقارالىق مادەني جانە كوركەمدىك ءىس-شارا ءوتىپ، 110000 ادام قاتىسقان.

ازيا ويىندارىندا 11 سپورت تۇرىنەن جۇلدە تاراتىلادى.

سپورتشىلار شورت-ترەك، كونكيمەن جۇگىرۋ، مانەرلەپ سىرعاناۋ، شايبالى حوككەي، كەرلينگ، تاۋ شاڭعىسى، سنوۋبوردينگ، فريستايل، شاڭعىمەن جارىسۋ، بياتلون جانە شاڭعى الپينيزمىنەن سىنعا تۇسەدى.

اۆتور

كۇنسۇلتان وتارباي