كەلەسى جىلدان باستاپ كىمدەردىڭ جالاقىسى وسەدى؟

استانا. KAZINFORM - كەلەسى جىلى دا سۋ شارۋاشىلىعى ماماندارىنىڭ جالاقىسى وسەدى. بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قاراعاندى وبلىسىنا رەسمي ءىس-ساپارى بارىسىندا مالىمدەدى.

«بيىل «قازسۋشار» قىزمەتكەرلەرىنىڭ ەڭبەكاقىسى ورتا ەسەپپەن 25 پايىزعا ءوستى. ەڭبەكاقىسى تاريف ەسەبىنەن تولەنەتىندەردىڭ دە، رەسپۋبليكالىق بيۋجەتتەن الاتىنداردىڭ دا ايلىعى كوتەرىلدى. كەلەسى جىلى دا ءبىز سۋ سالاسىنداعى مامانداردىڭ ەڭبەكاقىسىن كوتەرۋ بويىنشا جۇمىستى جالعاستىرامىز. ەلىمىزدىڭ سۋ قاۋىپسىزدىگىن قامتاماسىز ەتەتىن مامانداردىڭ ەڭبەگى لايىقتى تۇردە باعالانۋعا ءتيىس»، - دەدى مينيستر.

ەسكە سالايىق، بۇعان دەيىن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازاقستاندا قانشا ادام ەڭ تومەنگى جالاقى الاتىنىن ايتتى.

«قازاقستاندا 1 ميلليون 800 ادام ەڭ تومەنگى جالاقى، ياعني 85 مىڭ تەڭگە الىپ ءجۇر. ونىڭ ىشىندە شامامەن 361 مىڭى - ازاماتتىق جۇمىسشىلار»، - دەدى سۆەتلانا جاقىپوۆا.