كەلەسى جىلدان باستاپ ارنايى تاعىلىمداما باعدارلاماسى اشىلادى - ساياسات نۇربەك

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسىنىڭ Educational Testing Service (ETS) كومپانياسى جانە سميتسون ينستيتۋتى جەتەكشىلەرىمەن كەزدەسۋلەرى جونىندە پىكىر ءبىلدىردى.

بۇل تۋرالى اقوردانىڭ باسپا ءسوز قىزمەتى ءمالىم ەتتى.

ءمينيستردىڭ سوزىنشە، «بولاشاق» باعدارلاماسىنىڭ اياسىندا ەندى اتاقتى سميتسون ينستيتۋتى نەگىزىندە انتروپولوگيا، تاريح سىندى سالالاردا تاعىلىمدامالار وتكىزىلەدى.

- بۇگىن پرەزيدەنتىمىزدىڭ رەسمي ساپارىنىڭ اياسىندا ا ق ش- تىڭ ەكى ۇلكەن ينستيتۋتىمەن كەزدەسۋ وتكىزىلدى. ءبىرىنشىسى اتاقتى - سميتسون ينستيتۋتى. «بولاشاق» باعدارلاماسىنىڭ اياسىندا ەندى اتاقتى سميتسون ينستيتۋتى نەگىزىندە انتروپولوگيا، تاريح، مادەنيەتتانۋ، ءدىنتانۋ جانە تاعى باسقا دا سالالاردا تاعىلىمدامالار ۇيىمداستىرىلادى. كەلەسى جىلدان باستاپ ارنايى تاعىلىمداما باعدارلاماسى اشىلادى. ول عىلىمي قىزمەتكەرلەرىمىزگە، مادەنيەتتانۋشىلارىمىزعا، انتروپولوگ- تاريحشىلارىمىزعا ەڭ تەرەڭ تاريحي زەرتتەۋلەردى وسى ينستيتۋتتىڭ نەگىزىندە وتكىزۋگە مۇمكىندىك بەرەدى، - دەدى ساياسات نۇربەك.

عىلىم جانە جوعارى ءبىلىم مينيسترلىگىنىڭ باسشىسى

- ەكىنشى ۇلكەن كەزدەسۋ اتاقتى ETS - 80 -جىلدىق تاريحى بار ەڭ ءىرى تەست جاسايتىن جانە تەستولوگيانى زەرتتەيتىن عىلىمي ورتالىق. قازىرگى تاڭدا ءبىزدىڭ ۇلتتىق ءبىرىڭعاي تەستىلەۋدىڭ ساپاسىن كۇرت وزگەرتۋ، مازمۇنىن تولىققاندى قاراستىرۋ سياقتى جۇمىستار وسى ەڭ ءىرى، ەڭ اتاقتى تەستولوگيا عىلىمي ورتالىعىمەن اتقارىلاتىن بولادى. كەلەسى ايدا زەرتتەۋشىلەردىڭ ۇلكەن دەلەگاتسياسى قازاقستانعا كەلەدى. ءبىز وسى جۇمىستى جۇيەلى تۇردە اتقارامىز، - دەدى ول.

بۇدان بۇرىن حابارلانعانداي، قازاقستان ETS كومپانياسىنىڭ ءبىلىمدى تەستىلەۋ تاجىريبەسىن زەردەلەۋگە مۇددەلى.

سونىمەن قاتار پرەزيدەنت ا ق ش- تا قازاق مادەنيەتىن دارىپتەپ جۇرگەن سميتسون ينستيتۋتىنا العىس ايتتى.