كەلەسى جىلدان باستاپ الماتى وقۋشىلارىنا سۋ ۇنەمدەۋدى مەكتەپتەن باستاپ ۇيرەتەدى

الماتى. KAZINFORM - الماتىدا بالالار اراسىندا سۋ ۇنەمدەۋ مادەنيەتىن قالىپتاستىرۋ ءۇشىن سىنىپ ساعاتتارى وتەدى. بۇل Kazinform ساۋالىنا جاۋاپ بەرگەن الماتىنىڭ ەكولوگيا باسقارماسى حابارلادى.

بيىل 28-ءساۋىر كۇنى قالالىق ءماسليحات 2025- 2029 -جىلدارعا ارنالعان «تازا قازاقستان» تۇجىرىمداماسىن جۇزەگە اسىرۋ بويىنشا الماتىداعى ءىس-قيمىل جوسپارىن بەكىتتى.

بۇل جوسپاردا كوزدەلگەن قىسقا مەرزىمدى ماقساتتاردىڭ ءبىرى - «جاسىل مەكتەپ» جوباسىن ىسكە قوسۋ. ول بويىنشا 2026 -جىلى وقۋشىلار اراسىندا سۋ ۇنەمدەۋ تاقىرىبىندا سىنىپ ساعاتتارى وتكىزىلەتىن بولادى.

- مەكتەپتە وقۋشىلارعا تابيعي رەسۋرستاردى ۇتىمدى پايدالانۋدىڭ ماڭىزدىلىعى تۇسىندىرىلەدى، ەكولوگيالىق مادەنيەت قالىپتاستىرىلادى، سونداي-اق تۇرمىستا جانە مەكتەپتە سۋ تۇتىنۋدى ازايتۋدىڭ پراكتيكالىق تاسىلدەرى تالقىلانادى، - دەپ حابارلادى ەكولوگيا باسقارماسىنان.

ەسكە سالايىق، پرەزيدەنت قاسىم-جومارت توقايەۆ جىل باسىندا وتكەن ۇكىمەتتىڭ كەڭەيتىلگەن وتىرىسىندا سۋدى ۇنەمدەيتىن تەحنولوگيالاردى پايدالانۋ ماسەلەسى وتە وزەكتى ەكەنىن ايتقان ەدى.

سونىمەن قاتار 2024 -جىلى الماتى قالاسىنا ساپارى بارىسىندا مەملەكەت باسشىسى الماتىنى سۋمەن قامتاماسىز ەتۋ جالپىمەملەكەتتىك ماڭىزى بار باسىم مىندەت ەكەنىن اتاپ ءوتتى.

بۇعان دەيىن الماتى مەكتەپتەرىندە سەيسميكالىق قاۋىپسىزدىك جونىندە ساباق وتكىزىلەتىنىن جازعانبىز.

اۆتور

دوسبول اتاجان