كۇللى مۇسىلمان ۇمبەتىنىڭ ۇلىق مەرەكەسى - ورازا ايت باستالدى

استانا. KAZINFORM - بۇگىن جەر بەتىندەگى بارلىق مۇسىلمان قاۋىمى ءۇشىن ەڭ قاسيەتتى سانالاتىن ەكى ۇلىق مەرەكەنىڭ ءبىرى - ورازا ايت مەيرامى. مەرەكە ءۇش كۇنگە سوزىلادى.

«ايت» ءسوزى - «مەرەكەلەۋ»، «حال سۇراسۋ»، «ءبىر- ءبىرىن قۋانتۋ»، «قۋانىشقا توپتالۋ» دەگەن ماعىنالاردى بىلدىرەدى. جاراتۋشى يەمىز ءاربىر ىزگى امال مەن يگىلىكتى ءىستىڭ ساۋابىن بەرىپ، مەيىرىم-شاپاعاتىن توگەدى.

ايتتىڭ العاشقى كۇنى اللانىڭ رازىلىعى ءۇشىن ءبىر اي بويى اۋىز بەكىتىپ، مۇسىلماندىقتىڭ بەس پارىزىنىڭ ءبىرى سانالاتىن ورازانىڭ شارتتارىن ورىنداعان جاندار اۋىزدارىن اشادى.

مۇسىلماندار ورازامەن قيماي قوشتاسىپ، اللا تاعالاعا قاسيەتتى رامازان ايىنا اماندىقتا-ساۋلىقتا جەتكىزگەنىنە شەكسىز العىس ايتىپ، كەلەسى رامازان ايىنا دا ەسەندىكتە جەتۋلەرىن تىلەپ، ءمىناجات ەتەدى.

حاديس- شاريفتە ايتىلعانداي، اللا تاعالا: «پەندەلەرىم، مەن پارىز ەتكەن ورازانى اتقارىپ، اقىسىن الۋعا (ايت نامازىن وتەۋگە) مەشىتكە بەت الدى. ولار مەن ءۇشىن ورازا ۇستادى، مەنىڭ پارمەنىممەن اۋىز اشتى، ەندى قۋانىشقا كەنەلسىن...» - دەيدى.

ورازا ايت - وتباسىلىق مەرەكە. مەيرام كۇنى اتا-انامىزعا، كىشكەنتاي بۇلدىرشىندەرگە، اعايىن-تۋىستارعا سىيلىق ۇلەستىرىپ، ولاردى قۋانىشقا بولەۋ - مەرەكەنىڭ ءسانىن ارتتىرا تۇسەتىن يگى ءىس. جابىرقاعان جاندى دەمەپ، قاريالاردى قۋانىشقا بولەپ، كومەككە مۇقتاج ادامنىڭ العىسى مەن باتاسىن الۋ - ول دا ساۋاپتى امالدىڭ ءبىرى.

ورازا ايت كۇندەرى ءاربىر مۇسىلماننىڭ شاڭىراعىندا شەلپەك، باۋىرساق ءپىسىرىلىپ، ءار ۇيدە ادەتتەگىدەن ءسانى دە، سالتاناتى دا ەرەكشە مەرەكەلىك داستارقان جايىلىپ، قوناقتار شاقىرىلادى. سونىمەن قاتار جاعدايى تومەن ادامدارعا جاردەم كورسەتىلىپ، ولار دا مەيرامنان تىس قالدىرىلمايدى. بۇل كۇندەرى تۋعان- تۋىستار ءبىر جەرگە جينالىپ نەمەسە زيرات باسىنا بارىپ ومىردەن وزعان جاقىندارىنىڭ ءارۋاعىنا باعىشتاپ قۇران وقيدى.

قاسيەتتى رامازان ايىنان كەيىن كەلەتىن وسى ۇلىق مەرەكەنى الەمدەگى جالپى بۇكىل مۇسىلمان ايرىقشا قۋانىشپەن، زور ىقىلاسپەن اتاپ وتەدى. ويتكەنى رامازان - بەرەكە مەن بىرلىك، بەيبىتشىلىك، يگىلىك، كەشىرىم، مەيىرىم جانە قايىرىمدىلىقتىڭ ايى بولسا، ءۇش كۇن بويى اتالىپ وتىلەتىن ورازا ايت ادامداردىڭ جان دۇنيەسىن، سانا-سەزىمىن، كوڭىلىن قۋانىشقا بولەيتىن، كىربىڭنەن تازالايتىن ۇلىق مەرەكە بولىپ سانالادى.

ارادا قانشاما عاسىر وتسە دە، بۇل ۇلىق مەيرامنىڭ ءمان-ماڭىزى كەمىمەي، كەرىسىنشە جىل وتكەن سايىن ارتىپ كەلەدى. بۇل مەيرامنىڭ ادەتتەگىلەردەن نەگىزگى ەرەكشەلىكتەرى - ادامداردى باۋىرمالدىلىققا، كىشىپەيىلدىلىككە، كەشىرىمدىلىككە، سۇيىسپەنشىلىككە شاقىرادى. مۇسىلماندار قۇدىرەتى كۇشتى اللا تاعالانىڭ ادام بالاسىنا بەرگەن نىعمەتتەرىنە تاۋبە ايتىپ، شۇكىرشىلىك جاساۋعا ۇندەيدى.

قازاقستان مۇسىلماندارى ءدىني باسقارماسى وسى كۇنى وقىلاتىن ورازا ايت نامازىنىڭ ەلىمىز بويىنشا ازىرلەنگەن كەستەسىن جاريالاعان بولاتىن.