كۇدىكتى بوتەن ەمەس: ا ق ش-تا جاس ءوسپىرىم ءبىر وتباسىنىڭ 5 مۇشەسىن اتىپ ءولتىردى

استانا. KAZINFORM - ا ق ش-تىڭ ۆاشينگتون شتاتىنداعى ۇيلەردىڭ بىرىندە اتىس بولدى. سالدارىنان 5 ادام قازا تاۋىپ، جاس ءوسپىرىم كۇدىكتى رەتىندە قاماۋعا الىندى. بۇل تۋرالى «Associated Press» حابارلادى.

باسىلىمنىڭ مالىمەتىنشە، ۇستىمىزدەگى جىلدىڭ 21-قازانىندا تاڭەرتەڭ سيەتل قالاسىنىڭ وڭتۇستىك- شىعىسىنداعى ۇيلەردىڭ بىرىندە وق جاراقاتىنان كوز جۇمعان بەس ادام تابىلعان، كۇدىكتى رەتىندە جاس ءوسپىرىم قاماۋعا الىنعان.

اتىس تۋرالى 911-گە 21-قازاندا جەرگىلىكتى ۋاقىت بويىنشا تاڭعى ساعات 5:00 شاماسىندا حابارلانعان. وقيعا ورنىنا جەتكەن پوليتسيا بىردەن جاس ءوسپىرىمدى ۇستادى، جاراقات العان تاعى ءبىر جاس ءوسپىرىم سيەتل قالاسىنداعى اۋرۋحاناعا جەتكىزىلگەن. ەكەۋى دە وسى ۇيدە تۇرادى ەكەن.

پوليتسيانىڭ مالىمەتىنشە، قازا تاپقانداردىڭ ەكەۋى ەرەسەك، ۇشەۋى جاس ءوسپىرىم.

- مايىتتەردى تاپقاننان كەيىن ۇلكەن قىلمىس بولعانىن تۇسىندىك، - دەدى پوليتسيا وكىلى.

پوليتسيانىڭ ايتۋىنشا، اتىس وتباسى مۇشەلەرىنىڭ اراسىندا بولعان. الايدا ولاردىڭ قانداي قاتىسى بار ەكەنى بەلگىسىز. كۇدىكتى رەتىندە ۇستالعان جاس ءوسپىرىم كينگ وكرۋگىنىڭ كامەلەتكە تولماعاندار اباقتىسىنا قامالدى. سوتقا دەيىنگى تەرگەپ-تەكسەرۋ جۇمىستارى جۇرگىزىلىپ جاتىر.

اۆتور
جاراسقان نۇرىبايەۆ