كەدەرگى ەمەس، كوپىر سالۋ قاجەت

چيۋيفۋ. KAZINFORM - شاندۋڭ پروۆينسياسىنداعى چيۋيفۋ قالاسىندا وتكەن قىتاي مەديا كورپوراتسياسىنىڭ (CMG) IV عالامدىق مەديا- يننوۆاتسيالار فورۋمىنا قازاقستان رەسپۋبليكاسىنان پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا مەن «حابار» اگەنتتىگى» ا ق باسقارما ءتوراعاسى كەمەلبەك ويشىبايەۆ قاتىستى.

فورۋمنىڭ باستى سەسسياسىندا زاماناۋي تەحنولوگيالاردىڭ اسەرىنەن جاھاندىق مەديا- ەكوجۇيەنىڭ تۇرلەنۋى مەن ب ا ق-تىڭ وركەنيەتارالىق ديالوگكە ىقپالى تالقىلانىپ، وندا راۋشان قاجىبايەۆا ءسوز سويلەدى. ول «قازىرگى زامانعى تەحنولوگيالاردىڭ كەيدە كەرى باعىتتا، اتاپ ايتقاندا جاعىمسىز كونتەنتتى جاساۋ مەن تاراتۋ ءۇشىن پايدالانىلاتىنىن» ايتا كەلىپ:

- قازاقستاندىق جانە قىتايلىق ب ا ق ءداستۇرلى تۇردە شىنايى، سالماقتى ءارى شىندىققا نەگىزدەلگەن اقپاراتتارىمەن ەرەكشەلەنەدى. بۇل بىزگە كەدەرگى ەمەس، كوپىر سالۋعا مۇمكىندىك بەرەدى، - دەدى.

فوتو: Kazinform

سونداي-اق ول بىلاي دەپ وي ءبولىستى:

- قازاقستان مەن قىتايدىڭ مەدياداعى ارىپتەستىگى بەرىك، اراداعى مادەني ديالوگتى دامىتۋ باعىتىمەن ەرەكشەلەنەدى. بۇعان حالىقتاردىڭ ءوزارا تۇسىنىستىگى جانە ءبىر-بىرىنە دەگەن قۇرمەتى ارقىلى قول جەتكىزىپ وتىرمىز.

تەلەراديوكەشەن ديرەكتورى ءوز سوزىندە مەملەكەت باسشىسىنىڭ قازاق- قىتاي قارىم-قاتىناسى تۋرالى پىكىرىن ەسكە سالدى:

- كەشە ەلىمىزدىڭ پرەزيدەنتى قاسىم-جومارت توقايەۆ: «قىتاي حالقى قازاق حالقىنا ەشقاشان زيان تيگىزگەن ەمەس جانە بولاشاقتا دا تيگىزبەيدى» . بۇل سوزگە الىپ-قوسارىمىز جوق. ءبىز بۇل ويدى اقپاراتتىق سالاداعى كۇندەلىكتى جۇمىسىمىزدا بەرىك ۇستانۋعا دايىنبىز.

IV عالامدىق مەديا فورۋم بارىسىندا Euronews ديرەكتورلار كەڭەسىنىڭ ءتوراعاسى پەدرو ۆارگاس داۆيد، CNBC International پرەزيدەنتى ديپ باگچي، Associated Press-تەگى Global Media Services ۆيتسە- پرەزيدەنتى جانە اتقارۋشى ديرەكتورى ەندريۋ برەددەل، Reuters اگەنتتىگىنىڭ پرەزيدەنتى پول باسكوبەرت جانە باسقالارى ءسوز سويلەدى.

پلەنارلىق سەسسيا اياسىندا «پاندا پلانەتاسى» جوباسى مەن «قىتاي كوزگە كورىنبەيتىن مۇراسى ارقىلى» اتتى جاھاندىق تۋردىڭ باستالعانى جاريالاندى.

فوتو: Kazinform

سونىمەن قاتار فورۋم شەڭبەرىندە پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا مەن قىتاي مەديا كورپوراتسياسىنىڭ (CMG) پرەزيدەنتى ءارى باس رەداكتورى شىن حايسيۋن اراسىنداعى ەكىجاقتى كەزدەسۋ ءوتتى.

ايتا كەتەيىك، 2024 -جىلدىڭ شىلدە ايىندا قازاقستان مەن قىتاي كوشباسشىلارىنىڭ قاتىسۋىمەن پرەزيدەنت تەلەراديوكەشەنى مەن CMG ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويعان بولاتىن. قۇجات اقپاراتتىق كونتەنتپەن، تەلەباعدارلامالارمەن الماسۋعا، سونداي-اق ماتەريالداردى تاراتۋ جانە تاجىريبە الماسۋ ماسەلەلەرىندە ءوزارا قولداۋعا باعىتتالعان.

ق ر پرەزيدەنتىنىڭ تەلەراديوكەشەنى - تولىق سيكلدى قازاقستاندىق مەدياكومپانيا. ونىڭ قۇرامىنا رەسپۋبليكالىق «Jibek Joly» تەلەارناسى، حالىقارالىق «Silk Way» جانە «Silk Way Cinema» ارنالارىمەن قاتار، «قازاقپارات» حالىقارالىق اقپارات اگەنتتىگى جانە دەرەكتى كينو ورتالىعى كىرەدى.

قىتاي مەديا كورپوراتسياسى (CMG) - الەمدەگى ەڭ ءىرى مەدياكونگلومەراتتاردىڭ ءبىرى. ونىڭ قۇرامىندا قىتايدىڭ ورتالىق تەلەارناسى (CCTV)، قىتاي حالىقارالىق تەلەارنا جەلىسى (CGTN)، قىتاي ۇلتتىق راديوسى (CNR) جانە قىتاي حالىقارالىق راديوسى (CRI) بار. جالپى العاندا، كورپوراتسيا 47 تەلەارنا، 17 راديوستانسيا جانە 17 گازەتتى بىرىكتىرەدى.

اۆتور

گۇلنۇر عازيز قىزى