كاتونقاراعاي اۋىلىنداعى اۋەجاي كۇردەلى جوندەۋدەن ءوتۋى مۇمكىن

استانا. KAZINFORM - كولىك مينيسترلىگى Kazinform ساۋالىنا جولداعان جاۋاپتا شىعىس قازاقستان وبلىسىنداعى كاتونقاراعاي اۋدانىنىڭ ورتالىعىنا اۋە قاتىناسىن قالپىنا كەلتىرۋدىڭ كەلەشەگى تۋرالى مالىمەت بەردى.

«كاتونقاراعاي اۋىلىنىڭ سولتۇستىك- شىعىس بولىگىندە 1982 -جىلى سالىنعان بۇرىنعى اۋەجاي كەشەنى بار. اۋەجاي ىرگەلەس جەر ۋچاسكەسىمەن «شىعىس قازاقستان وبلىسىنىڭ اۆياتسيالىق بولىمشەسى» شارۋاشىلىق جۇرگىزۋ قۇقىعى بار كوممۋنالدىق مەملەكەتتىك كاسىپورنىنا تيەسىلى. نىسان تىكۇشاق تەحنيكاسىنا ارنالعان الاڭ جانە جانارماي قۇيۋ ستانتسياسى رەتىندە پايدالانىلادى. اۋەجايدىڭ قازىرگى تەحنيكالىق جاي- كۇيى ازاماتتىق اۆياتسيانىڭ قولدانىستاعى تالاپتارىنا سايكەس كەلمەيدى، تۇراقتى ۇشۋلاردى قالپىنا كەلتىرۋ ءۇشىن اۋەجايدى تولىق رەكونسترۋكتسيالاۋ قاجەت. شىعىس قازاقستان وبلىسىنىڭ اكىمدىگى كولىك مينيسترلىگىمەن بىرلەسىپ، وسى ماسەلەنى ۇلتتىق ينفراقۇرىلىمدىق جوسپاردىڭ جوباسىنا ەنگىزۋ مۇمكىندىگىن پىسىقتاپ جاتىر»، - دەپ جازىلعان رەسمي مالىمەتتە.

مينيسترلىك مالىمەتى بويىنشا، بيىل بالقاش قالاسىنداعى اۋەجايدىڭ رۋلدەۋ جولى مەن پەررونىنا كۇردەلى جوندەۋ جۇرگىزىلمەك.

«قازىرگى تاڭدا جوبالاۋ- سمەتالىق قۇجاتتاما ازىرلەنىپ، قارجىلاندىرۋ كوزدەرى انىقتالدى. بۇدان باسقا، ءۇرجار، ءۇشارال، زايسان جانە ارقالىق قالالارىندا اۋەجايلار سالۋ جانە رەكونسترۋكتسيالاۋ ماسەلەسىنىڭ ورىندىلىعى بويىنشا دا جۇمىستار جۇرگىزىلىپ جاتىر»، - دەلىنگەن جاۋاپتا.

بۇعان دەيىن كولىك ءمينيسترى مارات قارابايەۆ شىعىس قازاقستان وبلىسىنىڭ كاتونقاراعاي اۋدانىندا اۋەجاي سالۋ ماسەلەسى قاراستىرىلىپ جاتقانىن بىرنەشە رەت ايتقان بولاتىن.