قازىر ول تەراپيا بولىمىندە ەم الىپ، دارىگەرلەردىڭ تۇراقتى باقىلاۋىندا.
ماڭعىستاۋ وبلىسىندا وقۋ-جاتتىعۋ كەزىندە بولعان قايعىلى وقيعادان كەيىن اۋرۋحاناعا جاتقىزىلعان اسكەري قىزمەتشىنىڭ جاعدايى تۇراقتى. بۇل تۋرالى ماڭعىستاۋ وبلىسىنىڭ دەنساۋلىق ساقتاۋ باسقارماسىنىڭ باسشىسى بەكبولات ءىزباساروۆ مالىمدەدى.
- 24 -قىركۇيەكتە ماڭعىستاۋ وبلىسىندا بولعان قايعىلى وقيعاعا بايلانىستى اسكەري قىزمەتشىلەردىڭ ءبىرى وبلىستىق اۋرۋحاناعا جەتكىزىلدى. اۋرۋحاناعا تۇسكەن كەزدە وعان بارلىق قاجەتتى تەكسەرۋلەر جۇرگىزىلدى. قازىرگى ۋاقىتتا ونىڭ جاعدايى تۇراقتى. اسكەري قىزمەتشى تەراپيا بولىمىندە ەم الىپ جاتىر جانە مەديتسينا قىزمەتكەرلەرىنىڭ تۇراقتى باقىلاۋىندا،-دەدى بەكبولات ءىزباساروۆ.
بۇعان دەيىن 24-قىركۇيەكتە كاسپيي تەڭىزىنىڭ جاعالاۋىندا وقۋ-جاۋىنگەرلىك تاپسىرمانى ورىنداۋ كەزىندە توتەنشە جاعداي بولعانى حابارلانعان ەدى.
اۋا رايىنىڭ كۇرت ناشارلاپ، جەلدىڭ كۇشەيۋىنە بايلانىستى اسكەري قىزمەتشىلەردى تەڭىزگە الىپ كەتكەن. ناقتىلانعان مالىمەت بويىنشا، 12 ادام قازا تاپقان، ۇشەۋى قۇتقارىلعان، تاعى ەكى اسكەري قىزمەتشىنى ىزدەۋ جۇمىستارى جالعاسىپ جاتىر.
قايعىلى وقيعانىڭ بارلىق ءمان-جايىن انىقتاۋ ءۇشىن قازاقستاننىڭ باس پروكۋراتۋراسى قىلمىستىق ءىس قوزعادى. وقيعا ورنىندا ىشكى ىستەر مينيسترلىگى، توتەنشە جاعدايلار مينيسترلىگى جانە پروكۋراتۋرا قىزمەتكەرلەرىنىڭ قاتىسۋىمەن جەدەل-تەرگەۋ توبى جۇمىس ىستەپ جاتىر، قاجەتتى سوت ساراپتامالارى تاعايىندالدى. باس پروكۋراتۋرا اقتاۋ قالاسىندا اسكەري قىزمەتشىلەردىڭ قازا بولۋىنا قاتىستى تەرگەۋدى باقىلاۋعا الدى.
پرەزيدەنت قاسىم-جومارت توقايەۆ قازا تاپقان اسكەري قىزمەتشىلەردىڭ تۋعان- تۋىستارى مەن جاقىندارىنا كوڭىل ايتىپ، بولعان وقيعانىڭ بارلىق ءمان-جايىن انىقتاۋ جانە قازا تاپقانداردىڭ وتباسىلارىنا كومەك كورسەتۋ ءۇشىن قاجەتتى شارالار قابىلداۋدى تاپسىردى.
قايعىلى وقيعادان كەيىن پرەمەر- ءمينيستردىڭ وكىمىمەن اسكەري قىزمەتشىلەردىڭ قازا بولۋ سەبەپتەرىن تەرگەۋ جونىندەگى ۇكىمەتتىك كوميسسيا قۇرىلدى. ونىڭ قۇرامىنا قورعانىس مينيسترلىگىنىڭ، ماڭعىستاۋ وبلىسى اكىمدىگىنىڭ، توتەنشە جاعدايلار مينيسترلىگىنىڭ، دەنساۋلىق ساقتاۋ مينيسترلىگىنىڭ، ەڭبەك جانە حالىقتى الەۋمەتتىك قورعاۋ مينيسترلىگىنىڭ، كولىك مينيسترلىگىنىڭ، باس اسكەري پروكۋراتۋرانىڭ جانە شەكارا قىزمەتىنىڭ وكىلدەرى كىردى.
25-قىركۇيەك قازاقستاندا ماڭعىستاۋ وبلىسىندا قىزمەتتىك مىندەتتەرىن اتقارۋ كەزىندە اسكەري قىزمەتشىلەردىڭ قازا بولۋىنا بايلانىستى جالپى ۇلتتىق ازا تۇتۋ كۇنى بولىپ جاريالاندى.