ۇكىمەت باسشىسىنىڭ ايتۋىنشا، ماڭعىستاۋ وبلىسىندا بولعان قايعىلى وقيعالار اسكەري وقۋ-جاتتىعۋلاردى جوسپارلاۋ مەن وتكىزۋ كەزىندە جۇيەلى ماسەلەلەر بار ەكەنىن كورسەتتى.
— قورعانىس مينيسترلىگى جۇرگىزگەن كەشەندى تەكسەرۋ بارىسىندا وقۋ- جاتتىعۋلاردىڭ ءوتۋ بارىسىن باقىلاۋدا، ىقتيمال قاۋىپ-قاتەرلەردى باعالاۋدا جانە جاعداي وزگەرگەن كەزدە جەدەل ارەكەت ەتۋگە دايىندىقتا كەمشىلىكتەر انىقتالدى، — دەدى ولجاس بەكتەنوۆ.
ونىڭ سوزىنشە، وقۋ-جاتتىعۋلار كەزىندە قاۋىپتى جاعدايلارعا جەتكىلىكتى ءمان بەرىلمەگەن. قاۋىپسىزدىك تالاپتارىنىڭ ساقتالۋى ءتيىستى دەڭگەيدە قاداعالانباعان. سونداي-اق اسا قاۋىپتى كەزەڭدەردە وقۋ-جاتتىعۋلاردى ۋاقىتىندا توقتاتۋ تۋرالى شەشىم قابىلداۋدا كەمشىلىكتەر بولعان.
قازىر قازاقستان قارۋلى كۇشتەرىندە اۋەدەن باقىلاۋ جۇرگىزەتىن ۇشقىشسىز جۇيەلەر قولدانىلادى. ال كۇشتىك قۇرىلىمداردىڭ كەيبىر بولىمشەلەرىندە اسكەري قىزمەتشىلەردىڭ قاي جەردە جۇرگەنىن انىقتايتىن جانە ولاردىڭ اعزاسىنىڭ فيزيولوگيالىق كورسەتكىشتەرىن باقىلايتىن جەكە قۇرىلعىلار پايدالانىلادى.
سونىمەن قاتار كۇشتىك مەملەكەتتىك ورگاندار «قازگيدرومەت» كاسىپورنىمەن بىرلەسىپ جۇمىس ىستەيدى. ولار اۋا رايىنىڭ وزگەرۋى مەن داۋىل تۋرالى ەسكەرتۋلەردى تۇراقتى تۇردە الىپ وتىرادى.
پرەمەر-ءمينيستردىڭ ايتۋىنشا، پرەزيدەنتتىڭ تاپسىرماسىمەن اسكەري رەفورما جوسپارىنىڭ جوباسى ازىرلەندى. قۇجاتتا اسكەردى باسقارۋ جۇيەسىن جەتىلدىرۋ، وقۋ-جاتتىعۋلاردى جوسپارلاۋدىڭ ورتاق ءتارتىبىن قالىپتاستىرۋ جانە اسكەري قىزمەتشىلەردىڭ قاۋىپسىزدىگىن قامتاماسىز ەتۋ تالاپتارىن قاتاڭ ساقتاۋ كوزدەلگەن.
ەسكە سالا كەتەيىك، بۇعان دەيىن قاۋىپسىزدىك كەڭەسىنىڭ وتىرىسىندا قورعانىس ءمينيسترى مەملەكەت باسشىسىنا قازاقستان قارۋلى كۇشتەرىن جاڭعىرتۋ جوسپارىن تانىستىرعان بولاتىن. پرەزيدەنت اسكەري رەفورما جوسپارىن ماقۇلدادى. جوسپاردىڭ ورىندالۋىن ۇيلەستىرۋ ۇكىمەت پەن قاۋىپسىزدىك كەڭەسىنە جۇكتەلدى.