كاسپيدىڭ بولاشاعىنا الاڭداعان قازاقستان بەس ەلگە كۇش بىرىكتىرۋدى ۇسىندى

استانا. KAZINFORM - كاسپي تەڭىزىنىڭ دەڭگەيى تومەندەپ، وڭىردەگى ەكولوگيالىق جاعداي كۇردەلەنىپ بارادى. قازاقستان تەڭىزدى ساقتاپ قالۋ ءۇشىن بەس كاسپي ماڭى مەملەكەتىنىڭ كۇش- جىگەرىن بىرىكتىرىپ، بىرلەسكەن مونيتورينگ جۇيەسىن قۇرۋدى جانە 2026- 2036 -جىلدارعا ارنالعان ءىس-قيمىل جوسپارىن ازىرلەۋدى ۇسىندى. بۇل تۋرالى ەكولوگيا مينيسترلىگى ءمالىم ەتتى.

Фото: Экология министрлігі

قازاقستان كاسپي تەڭىزىنىڭ ەكوجۇيەسىن ساقتاۋ جانە ونىڭ دەڭگەيىن تومەندەتۋگە قارسى ءىس-قيمىل ماقساتىندا حالىقارالىق جانە وڭىرلىك ىنتىماقتاستىقتى نىعايتۋعا بەيىلدىلىگىن راستادى.

حالىقارالىق كەزدەسۋدە ءسوز سويلەگەن قازاقستاندىق تاراپ ورتاشا جىلدىق تەمپەراتۋرانىڭ ءوسۋ قارقىنى الەمدىك ورتاشا كورسەتكىشتەردەن 2,5 ەسە اساتىن كاسپي وڭىرىندەگى كليماتتىق وزگەرىستەردىڭ ۇدەۋىنە الاڭداۋشىلىق ءبىلدىردى.

Фото: Экология министрлігі

كاسپيدىڭ سولتۇستىك- شىعىس جاعالاۋى، جاعالاۋداعى قاۋىمداستىقتاردىڭ ءال-اۋقاتى جانە ايماقتىڭ تۇراقتى دامۋى ءۇشىن تايازدىقتىڭ اسەرىنە ەرەكشە نازار اۋدارىلدى.

- قازاقستان كاسپي تەڭىزىنىڭ دەڭگەيىن تومەندەتۋ ماسەلەسى بويىنشا ۇكىمەتارالىق كوميسسيا قۇرۋدى، سونداي-اق قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ۇسىنعان كاسپي سۋ رەسۋرستارىن ساقتاۋ جونىندەگى مەملەكەتارالىق باعدارلامانى ىلگەرىلەتۋدى قوسا العاندا، كاسپي ماڭى مەملەكەتتەرىنىڭ باستامالارىن قۇپتادى، - دەلىنگەن حابارلامادا.

Фото: Экология министрлігі

ءارى قارايعى جۇمىستىڭ باسىم باعىتتارى رەتىندە قازاقستان كاسپي تەڭىزى دەڭگەيىنىڭ اۋىتقۋى بويىنشا 2026-2036 -جىلدارعا ارنالعان ءىس-قيمىل جوسپارىن ازىرلەۋدى، بىرلەسكەن مونيتورينگ پەن بولجاۋ جۇيەلەرىن نىعايتۋدى، سونداي-اق جاعالاۋ اۋماقتارىن بەيىمدەۋ شارالارىن ازىرلەۋدى قوسا العاندا، ساياسي ۋاعدالاستىقتاردان بىرلەسكەن شارالاردى پراكتيكالىق ىسكە اسىرۋعا كوشۋدى بەلگىلەدى.

قازاقستان COP31-گە ۇسىنعان كاسپي ءوڭىرى ءۇشىن باسىم ەكولوگيالىق جانە بەيىمدەۋ جوبالارىن ىسكە اسىرۋعا جاردەمدەسۋگە ارنالعان وڭىرلىك ينۆەستيتسيالىق باعدارلاما جەكە اتاپ ءوتىلدى. قازاقستان سونداي-اق حالىقارالىق ۇيىمداردى، قارجى ينستيتۋتتارىن جانە دامۋ بويىنشا سەرىكتەستەردى تارتۋ ءۇشىن «كاسپي تەڭىزىنىڭ دوستارى» پلاتفورماسىن ودان ءارى دامىتۋدى جاقتادى.

كاسپي تەڭىزىن ساقتاۋدا ناقتى جانە ولشەنەتىن ناتيجەلەرگە قول جەتكىزۋ ءۇشىن قولدانىستاعى وڭىرلىك تەتىكتەر، ەڭ الدىمەن تەگەران كونۆەنتسياسى نەگىزىندە بەس كاسپي ماڭى مەملەكەتتەرىنىڭ كۇش-جىگەرىن شوعىرلاندىرۋ قاجەتتىگى اتاپ ءوتىلدى.

ايتا كەتەيىك، بۇگىن قۇرىلتاي دەپۋتاتى ارمان حايرۋلليننىڭ پرەمەر-ءمينيستردىڭ ورىنباسارى قانات بوزىمبايەۆتىڭ اتىنا كاسپي تەڭىزىن ساقتاۋعا باعىتتالعان ەكولوگيالىق شارالار بويىنشا ساۋال جولداعان ەدى. ونىڭ ايتۋىنشا، سوڭعى 25 جىلدا تەڭىز اكۆاتورياسى 16 مىڭ شارشى كيلومەترگە ازايعان. تارتىلعان سولتۇستىك كاسپيدە شاڭدى داۋىلدار جيىلەپ، تۇزدى توزاڭ «بالشىق جاۋىنى» بولىپ تۇسەدى. وسىعان بايلانىستى ارال تاجىريبەسى نەگىزىندە كەپكەن اۋماقتارعا فيتومەليورانتتار ەگۋ قاجەت.