اكىمدىكتىڭ مالىمەتىنشە، ماڭعىستاۋ وبلىسىندا اسكەري وقۋ-جاتتىعۋ كەزىندە ورىن العان قايعىلى وقيعاعا بايلانىستى 2026-جىلعى 25-27-قىركۇيەك ارالىعىندا اقتاۋ قالاسىنداعى «امفيتەاتر» الاڭىندا وتكىزىلۋى جوسپارلانعان مەرەكەلىك ءىس-شارالار وتكىزىلمەيدى.
- اتاپ ايتقاندا، 25-قىركۇيەككە جوسپارلانعان «كاسپي - دوستىق تەڭىزى» فەستيۆالىنىڭ سالتاناتتى اشىلۋى، سونداي-اق 27-قىركۇيەكتە وتەتىن فەستيۆال-بايقاۋدىڭ جابىلۋ سالتاناتى مەن اقتاۋ قالاسىنىڭ تۋعان كۇنىنە ارنالعان مەرەكەلىك گالا- كونتسەرت وتكىزىلمەيدى. قالا اكىمدىگى اسكەري وقۋ-جاتتىعۋ كەزىندە قازا بولعان ساربازداردىڭ وتباسىلارى مەن جاقىن-جۋىقتارىنا قايعىرىپ كوڭىل ايتادى، - دەلىنگەن ۆەدومستۆو حابارلاماسىندا.
ەسكە سالايىق، 2026-جىلعى 24-قىركۇيەكتە كاسپييدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسىپ جاتىر.
كەيىنىرەك اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.
ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى.
كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.
سونىمەن قاتار پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.