بۇل شەشىم قازاقستاننىڭ كاسىپقوي رينگتە جۇرگەن بوكسشىلارىنا دا وليمپياداعا قاتىسۋعا جول اشۋى مۇمكىن. قازاقستان بوكس فەدەراتسياسىنىڭ وكىلى Tengri Sport-قا بەرگەن سۇحباتىندا ەلىمىزدەگى ىرىكتەۋ تارتىبىنە قاتىستى ءسوز قوزعادى.
ا ق ش كاسىپقوي بوكسشىلارعا قالاي مۇمكىندىك بەرمەك؟
2016-جىلدان باستاپ كاسىپقوي بوكسشىلارعا وليمپيادا ويىندارىنا قاتىسۋعا رۇقسات بەرىلگەن. العاشىندا جەكپە-جەك سانىنا شەكتەۋ قويىلىپ، 15 كەزدەسۋدەن ارتىق جۇدىرىقتاسقان سپورتشىلار وليمپياداعا قاتىسا المايتىن. كەيىن بۇل تالاپتى الىپ تاستادى.
قازىر حالىقارالىق وليمپيادا كوميتەتى مەن World Boxing ۇيىمىنىڭ ەرەجەلەرىندە كاسىپقوي بوكسشىلاردىڭ وليمپياداعا قاتىسۋىنا جالپى تىيىم جوق. دەگەنمەن كاسىبي بوكس ۇيىمدارىنىڭ تالاپتارى مەن ۇلتتىق فەدەراتسيالاردىڭ ىشكى ەرەجەلەرى سپورتشىلاردىڭ جولىن شەكتەۋى مۇمكىن.
ماسەلەن، دۇنيەجۇزىلىك بوكس كەڭەسى (WBC) كاسىپقوي بوكسشىلاردىڭ وليمپياداعا قاتىسۋىنا قارسى. ۇيىمنىڭ تالابىنا سايكەس، رەيتينگتىڭ ۇزدىك 15 بوكسشىسىنا ەكى جىلعا جارىستاردان شەتتەتىلۋ قاۋپى ءتونۋى مۇمكىن.
2026-جىلى 21-قازاندا ا ق ش بوكس فەدەراتسياسى كاسىپقوي سپورتشىلاردىڭ ۇلتتىق قۇراماعا ىرىكتەلۋىنە مۇمكىندىك بەرەتىن جاڭا جۇيەنى جاريالادى. العاشىندا كاسىپقوي بوكسشىلار اراسىندا ارنايى تۋرنير وتەدى. وليمپيادالىق سالماق دارەجەلەرىندە جەڭىسكە جەتكەن سپورتشىلار 2027-جىلى ا ق ش- تىڭ ەليتالىق قۇراماسىن جاساقتاۋعا ارنالعان ىرىكتەۋ-جاتتىعۋ جيىنىنا شاقىرىلادى.
بۇل باستاما ا ق ش قۇراماسىنىڭ باسەكەگە قابىلەتتىلىگىن ارتتىرىپ، 2027-جىلعى پانامەريكالىق ويىندار مەن 2028-جىلعى وليمپيادا الدىندا مىقتى سپورتشىلاردى ىرىكتەۋگە باعىتتالعان.
قازاقستاندىق كاسىپقوي بوكسشىلار وليمپياداعا قاتىسا الا ما؟
قازاقستاندا ا ق ش- تاعىداي كاسىپقوي بوكسشىلارعا ارنالعان جەكە ىرىكتەۋ جۇيەسى جوق. الايدا ولاردىڭ ۇلتتىق قۇراماعا قوسىلۋىنا تىكەلەي تىيىم دا قويىلماعان. قازاقستان بوكس فەدەراتسياسىنىڭ اتقارۋشى ديرەكتورى راۋان يگەنيەۆتىڭ ايتۋىنشا، كاسىپقوي رينگتە ونەر كورسەتەتىن سپورتشىلار قازاقستان چەمپيوناتىنا قاتىسىپ، جۇلدەلى ورىن العان جاعدايدا ۇلتتىق قۇراماعا ۇمىتكەر بولا الادى.
كاسىپقوي بوكستا جۇدىرىقتاسىپ جۇرگەن سپورتشىلار قازاقستان چەمپيوناتىنا قاتىسىپ، جۇلدەگەرلەر قاتارىنان كورىنسە، ۇلتتىق قۇراماعا قابىلدانا الادى. ولار سپورتتى دامىتۋ ديرەكسياسىنا قىزمەتكەر رەتىندە تىركەلىپ، جالاقى الادى جانە ۇلتتىق قۇرامانىڭ مۇشەسى بولادى. ال ناقتى ىرىكتەۋ كەزىندە باس باپكەر سپورتشىلاردىڭ تۋرنيرلەردەگى ناتيجەلەرىن ەسكەرە وتىرىپ، ۇمىتكەرلەردى انىقتايدى. كاسىپقوي بوكسشىلارعا قاتىستى ەشقانداي شەكتەۋ جوق، - دەدى راۋان يگەنيەۆ Tengri Sport باسىلىمىنا بەرگەن سۇحباتىندا.
ونىڭ سوزىنشە، كاسىپقوي بوكسشىلاردىڭ وليمپياداعا قاتىسۋ ماسەلەسى ا ق ش- تا سپورتتى قارجىلاندىرۋ جۇيەسىنىڭ ەرەكشەلىگىنە بايلانىستى وزەكتى بولىپ وتىر. امەريكادا كاسىپقوي جانە وليمپيادالىق بوكس ەكى ءتۇرلى باعىتتا داميدى. كاسىپقوي بوكس نەگىزىنەن كوممەرتسيالىق جۇيەگە سۇيەنسە، وليمپيادالىق بوكس مەملەكەتتىك قولداۋ مەن سپورت ينستيتۋتتارىنىڭ كومەگىنە ارقا سۇيەيدى.
USA Boxing فەدەراتسياسىنىڭ كاسىپقوي بوكسشىلارعا ۇلتتىق قۇراماعا جول اشۋ تۋرالى شەشىمىن وڭ قادام دەپ سانايمىن. بۇل باسەكەلەستىكتى كۇشەيتىپ، تاجىريبەلى ءارى تالانتتى سپورتشىلاردى تارتۋعا جانە ەلدەگى وليمپيادالىق بوكستىڭ دەڭگەيىن كوتەرۋگە مۇمكىندىك بەرەدى. مۇنداي شەشىمنەن سپورتشىلار دا، ۇلتتىق قۇراما دا، جالپى وليمپيادالىق بوكس تا ۇتادى، - دەدى فەدەراتسيا وكىلى.
كاسىپقوي بوكسشى ەل چەمپيوناتىنا قالاي قاتىسادى؟
راۋان يگەنيەۆتىڭ تۇسىندىرۋىنشە، قازاقستاندا كاسىپقوي بوكسشى ەل چەمپيوناتىنا قاتىسۋ ءۇشىن ءوزى وكىلدىك ەتەتىن ءوڭىردىڭ بوكس فەدەراتسياسىنا جۇگىنە الادى. وڭىرلىك فەدەراتسيا سپورتشىنىڭ كانديداتۋراسىن قاراپ، بەلگىلەنگەن تالاپتارعا ساي بولعان جاعدايدا ونى جارىستىڭ رەسمي وتىنىمىنە ەنگىزەدى.
مۇنداي تاجىريبەگە ابىلايحان ءجۇسىپوۆتى مىسال ەتۋگە بولادى. ول بۇعان دەيىن كاسىپقوي رينگتە ونەر كورسەتىپ، كەيىن وليمپيادالىق بوكسقا قايتا ورالۋدى ۇيعارعان. سپورتشىنىڭ جارىسقا قاتىسۋى قاراعاندى وبلىسىنىڭ بوكس فەدەراتسياسىمەن كەلىسىلگەن.
قازاقستان بوكس فەدەراتسياسىنىڭ ۇستانىمى بويىنشا، سپورتشىلاردىڭ مارتەبەسىنە قاراماستان، ولاردىڭ ءادىل باسەكەدە ءوز مۇمكىندىگىن كورسەتۋىنە جاعداي جاسالۋى كەرەك. دەگەنمەن بارلىق قاتىسۋشى قولدانىستاعى جارىس ەرەجەلەرى مەن تالاپتارىنا ساي بولۋى شارت.
وليمپيادا الدىندا باسەكە كۇشەيە مە؟
كاسىپقوي بوكسشىلاردىڭ تاجىريبەسى مول بولعانىمەن، بۇل ولاردىڭ وليمپيادادا مىندەتتى تۇردە باسىم تۇسەتىنىن بىلدىرمەيدى. سەبەبى كاسىپقوي جانە وليمپيادالىق بوكستىڭ دايىندىق جۇيەسى، جەكپە-جەك جۇرگىزۋ تاكتيكاسى مەن فيزيكالىق جۇكتەمەسى ءارتۇرلى.
راۋان يگەنيەۆ كاسىپقوي بوكستى مارافونعا، ال وليمپيادالىق بوكستى سپرينتكە ۇقساتادى. كاسىپقوي رينگتە بوكسشىعا جەكپە-جەك بارىسىندا قارسىلاسىن زەرتتەپ، تاكتيكاسىن بىرتىندەپ وزگەرتۋگە جانە كەيىنگى راۋندتاردا باسىمدىققا قول جەتكىزۋگە مۇمكىندىك بار. سوندىقتان مۇندا توزىمدىلىك پەن كۇش دايىندىعى ماڭىزدى ءرول اتقارادى.
ال وليمپيادالىق بوكستا ءار راۋندتىڭ ماڭىزى زور. سپورتشى العاشقى سەكۋندتاردان باستاپ جىلدامدىق، دالدىك، جوعارى قارقىن جانە تاكتيكالىق يكەمدىلىك تانىتۋى كەرەك. قارسىلاسىن ۇزاق ۋاقىت زەرتتەپ، بىرتىندەپ قاجىتۋعا مۇمكىندىك از. ارينە، كەيبىر كاسىپقوي بوكسشىلار كۇش-قۋاتى، تاجىريبەسى نەمەسە جەكە شەبەرلىگى جاعىنان وليمپيادالىق بوكس وكىلدەرىنەن باسىم بولۋى مۇمكىن. الايدا بۇل ءۇش راۋندقا سوزىلاتىن جەكپە-جەكتە دە ولاردىڭ مىندەتتى تۇردە جەڭەتىنىن بىلدىرمەيدى. سوندىقتان كاسىپقوي جانە وليمپيادالىق بوكستىڭ ءبىرىن ەكىنشىسىنەن جوعارى قويۋ دۇرىس ەمەس. ەكى باعىتتىڭ دا وزىندىك ەرەكشەلىگى مەن سپورتشىعا قوياتىن تالابى بار.
El.kz