كاسىپقوي بوكس: دۇنيەجۇزىلىك بوكس ۇيىمى جانىبەك ءالىمحان ۇلىنىڭ كەلەسى قارسىلاسىن اتادى

استانا. KAZINFORM - دۇنيەجۇزىلىك بوكس ۇيىمى (WBO) قازاقستاندىق بوكسشى جانىبەك ءالىمحان ۇلىنا (16-0، 11 ك و) مىندەتتى قارسىلاس بەلگىلەدى.

WBO ۇيىمىنىڭ رەسمي حابارلاماسىنا سايكەس، قازاقستاندىق بوكسشى ورتا سالماقتاعى WBO تۇجىرىمى بويىنشا الەم چەمپيونى تيتۋلىن ۇلى بريتانيالىق بوكسشى حامزا شيرازعا (21-0، 17 ك و) قارسى قورعاۋى كەرەك.

WBO ۇيىمى مىندەتتى جەكپە-جەك تۋرالى حابارلامانى ەكى بوكسشىنىڭ پروموۋتەرلەرىنە ەسكەرتكەن. قوس تاراپقا جەكپە- جەك وتكىزۋگە كەلىسسوز جۇرگىزۋ ءۇشىن 15 كۇن بەرىلدى. ەگەر بوكسشىلاردىڭ كومانداسى ورتاق شەشىمگە كەلە الماسا، جەكپە-جەك WBO ەرەجەسىنە سايكەس ءباس ساۋداعا سالىنادى جانە ەڭ تومەنگى سوما 200 مىڭ دوللار كولەمىندە بەلگىلەنگەن.

ايتا كەتەيىك، وتانداسىمىز جۇما كۇنى سيدنەيدە جاڭازەلانديالىق اندرەي ميحايلوۆيچتى 9-راۋندتا تەحنيكالىق نوكاۋتپەن جەڭىپ، ورتا سالماقتاعى IBF الەم چەمپيونى تيتۋلىن ءساتتى قورعادى.

بۇعان دەيىن حابارلاعانىمىزداي، WBO ۇيىمى جەكپە- جەككە ءبىر كۇن قالعاندا، جانىبەك- ميحايلوۆيچ ايقاسىندا قازاقستاندىق بوكسشىعا WBO تيتۋلىن قورعاۋعا وردەر بەردى. الايدا، ءميحايلوۆيچتىڭ كومانداسى تەك IBF تيتۋلى ءۇشىن جۇدىرىقتاساتىنىن العا تارتىپ، بوكس كەشىندە WBO تيتۋلى ساراپقا سالىنبادى.

سونداي-اق، WBO ۇيىمى جانىبەك ءالىمحان ۇلىنا چەمپيوندىق اتاعىن ساقتاپ قالۋ ءۇشىن 5 كۇن ۋاقىت بەردى.

اۆتور
مۇحتار قاليموللا ۇلى