BoxRec پورتالىنداعى اقپاراتقا سايكەس، جانىبەك رەيتينگىدە ءبىر ساتى جوعارىلاپ، 857 ۇپايمەن ورتا سالماقتا ەكىنشى ورىنعا جايعاستى. بۇل سالماقتا كۋبالىق امەريكالىق بوكسشى ەريسلاندي لارا (31-3-3، 19 ك و) كوش باستاسا، انگليالىق بوكسشى كىشى كريس يۋبانك (34-3، 25 ك و) ۇزدىك ۇشتىكتى تۇيىندەدى.
جانىبەكتىڭ سوڭعى قارسىلاسى فرانسيالىق اناۋەل نگاميسسينگە (14-1، 9 ك و) رەيتينگىدە ءۇش ساتىعا تومەندەپ، قازىرگى ۋاقىتتا 12- ورىننان كورىندى.
ايتا كەتەرلىگى، جانىبەك BoxRec پورتالىنىڭ بارلىق سالماق كاتەگورياسى بويىنشا الەم رەيتينگىسىندە 18-ورىنعا جايعاستى. كوش باسىندا جاپوندىق ناويا ينوۋە، امەريكالىق تەرەنس كروۋفورد جانە رەسەيلىك دميتري بيۆول تۇر.
ەسكە سالايىق، جانىبەك ءالىمحان ۇلى 5-ءساۋىر كۇنى استانادا ءوتىپ جاتقان «Battle of the Brave» بوكس كەشىنىڭ باستى جەكپە-جەگىندە فرانسيالىق قارسىلاسىن 5-راۋندتا نوكاۋتپەن جەڭىپ، چەمپيوندىق بەلدىكتەرىن ءساتتى قورعادى.
مەملەكەت باسشىسى قاسىم-جومارت توقايەۆ سپورتشىنى جەڭىسىمەن قۇتتىقتادى.
اۆتور
مۇحتار قاليموللا ۇلى