كاسىپكەر تاپشىلىق كەزىن پايدالانىپ گازدى قىمباتقا ساتقان

استانا. KAZINFORM - اقتوبە وبلىسىنىڭ حرومتاۋ قالاسىندا كاسىپكەر گاز تاپشىلىعىن پايدالانىپ، قۇنى 59 تەڭگە تۇراتىن الەۋمەتتىك سۇيىتىلعان گازدى 70 تەڭگەدەن ساتقان، دەپ حابارلايدى ساۋدا كوميتەتىنىڭ باسپا ءسوز قىزمەتى.

«سامارا- شىمكەنت» تراسساسى بويىندا ورنالاسقان جانارماي قۇيۋ بەكەتىنەن قىمبات باعانى بايقاعان قالا تۇرعىنى شاعىم قالدىردى.

وسى جاعدايعا قاتىستى تۇسكەن ماتەريالدار نەگىزىندە اقتوبە وبلىسى بويىنشا ساۋدا جانە تۇتىنۋشىلار قۇقىقتارىن قورعاۋ دەپارتامەنتى ءىستىڭ ءمان- جايىن مۇقيات زەرتتەپ، جانارماي قۇيۋ بەكەتىنىڭ ارەكەتتەرى ق ر اكىمشىلىك قۇقىق بۇزۋشىلىق تۋرالى كودەكسىنىڭ 193-بابىنىڭ 4-بولىگىن بۇزاتىنىن انىقتادى. جانارماي قۇيۋ ستانتسياسىنىڭ يەسىنە اكىمشىلىك حاتتاما تولتىرىلىپ، ايىپپۇل سالىندى.

«سۇيىتىلعان گاز اقتوبە وبلىسىنداعى اۆتوكولىك يەلەرى اراسىندا ۇلكەن سۇرانىسقا يە. وبلىستا 50 مىڭنان استام گازبەن جۇرەتىن كولىك تىركەلگەن، وعان قوسا ترانزيتتىك كولىكتەر. سوڭعى ۋاقىتتا سۇيىتىلعان گازدى تۇتىنۋدىڭ وسۋىنە بايلانىستى اۆتوگاز قۇيۋ بەكەتتەرىندە گاز تاپشىلىعى بايقالادى. وسى ورايدا كەيبىر كاسىپكەرلەر جاعدايدى پايدالانىپ، ارتىق پايدا تابۋعا تىرىسىپ جاتىر. دەگەنمەن باعانى نەگىزسىز وسىرۋگە، اسىرەسە تاپشىلىق تۋىنداعان ساتتە ءونىمنىڭ قۇنىن ارتتىرۋعا بولمايتىنىن كاسىپكەرلەردىڭ تاعى ءبىر ەسىنە سالعىمىز كەلەدى»، - دەدى وڭىرلىك دەپارتامەنت باسشىسى قايرات رايىمقۇلوۆ.

سونىمەن قاتار ساۋدا زاڭناماسىنا مەملەكەتتىك باقىلاۋ جۇرگىزۋ اياسىندا ەل اۋماعىندا باعا بەلىگىسىندە كورسەتىلگەن باعادان قىمبات تاۋار ساتقان 68 كاسىپكەرلىك سۋبەكتىسىن جاۋاپكەرشىلىككە تارتتى. بۇل شارالار تۇتىنۋشىلاردىڭ قۇقىقتارىن قورعاۋ جانە باعا ساياساتىنىڭ زاڭدىلىعىن قامتاماسىز ەتۋگە باعىتتالعان.

اقتوبە وبلىسى بويىنشا وسىنداي قۇقىق بۇزۋشىلىقتار انىقتالعان جاعدايدا 87132548126 تەلەفونى ارقىلى دەپارتامەنتكە حابارلاۋىڭىزدى سۇرايمىز. نەمەسە «E-otinish» پورتالى ارقىلى جازباشا ارىز-شاعىم قالدىرۋعا بولادى.

اۆتور

ەربول جانات