كاسپيدەگى يتبالىقتىڭ جاپپاي قىرىلۋى: الدىن الا سەبەبى ايتىلدى

استانا. KAZINFORM - اۋىل شارۋاشىلىعى مينيسترلىگى كاسپي تەڭىزىندە قىرىلعان يتبالىقتاردى زەرتتەۋگە قاتىستى الدىن الا مالىمەتتى جاريالادى.

«24 -قازان مەن 13 -قاراشا ارالىعىندا جايىق-كاسپي وبلىسارالىق بالىق شارۋاشىلىعى باسسەيندىك ينسپەكسياسىنىڭ ماماندارى ماڭعىستاۋ وبلىسىنىڭ ءتۇپقاراعان اۋدانىندا كاسپي تەڭىزىنىڭ جاعالاۋىنان 1034 يتبالىق تاپتى. مونيتورينگ جانە گيدروبيولوگيا جانە ەكولوگيا ينستيتۋتى، يتبالىقتاردى زەرتتەۋ جانە وڭالتۋ ورتالىعى جانە ميكروبيولوگيا ع ز ي جانە ۆيرۋسولوگيا ع ز و سياقتى عىلىمي ۇيىمدارمەن بىرلەسىپ جۇمىس ىستەۋ بارىسىندا ودان ءارى زەرتتەۋلەر جۇرگىزۋ ءۇشىن ولگەن جانۋارلاردىڭ تىندەرىن ءىشىنارا ىرىكتەۋ جۇرگىزىلدى. بالىق شارۋاشىلىعى كوميتەتى تابيعي قۇبىلىستار، سونىڭ ىشىندە سۋ استىنداعى جەر سىلكىنىسى سالدارىنان تابيعي گازدار شىعارىندىلارى سەبەپ بولۋى مۇمكىن دەپ بولجايدى. يتبالىقتاردىڭ ءولۋ سەبەپتەرى تۋرالى تۇپكىلىكتى تۇجىرىمدار عىلىمي ۇيىمداردىڭ مالىمەتتەرى بويىنشا 3-4 ايعا سوزىلاتىن زەرتحانالىق زەرتتەۋلەر اياقتالعاننان كەيىن الىنادى. بالىق ينسپەكسياسى يتبالىقتاردىڭ ءولۋ فاكتورلارىن انىقتاۋ ءۇشىن اۋماقتىق سۋلاردىڭ اكۆاتورياسىنا تۇراقتى مونيتورينگ جۇرگىزۋدى جالعاستىرۋدا»، - دەلىنگەن اۋىل شارۋاشىلىعى مينيسترلىگىنىڭ حابارلاماسىندا.

مينيسترلىكتىڭ حابارلاۋىنشا، ۆەتەريناريالىق باقىلاۋ جانە قاداعالاۋ كوميتەتىنىڭ قىزمەتكەرلەرى قازىرگى ۋاقىتتا استاناداعى ۆەتەريناريا جونىندەگى ۇلتتىق رەفەرەنتتىك ورتالىقتا جۇقپالى اۋرۋلاردىڭ بار-جوعىنا زەرتتەۋ جۇرگىزىلىپ جاتقان پاتولوگيالىق ماتەريالدىڭ سىنامالارىن ىرىكتەپ الدى. 2024 -جىلدىڭ 13 -قاراشاسىندا پاستەرەللەز، قۇس تۇماۋى، جىرتقىش وبا، سالمونەللەز جانە ليستەريوزعا ارنالعان پتر ادىسىمەن زەرتتەلگەن بارلىق سىنامالار تەرىس ناتيجە كورسەتتى.

كاسپي تەڭىزىنىڭ جاعالاۋىنا مونيتورينگ جالعاسۋدا.

ايتا كەتۋ كەرەك، كاسپي تەڭىزىندە يتبالىقتاردىڭ جاپپاي قىرىلۋ جاعدايلارى 2000 -جىلداردىڭ باسىنان بەرى تىركەلىپ كەلەدى. اتاپ ايتقاندا، 2000 -جىلى 10000-عا جۋىعى تىركەلىپ جانە ولاردىڭ ءولىمىنىڭ سەبەبى سوزىلمالى توكسيكوز ەكەنى انىقتالعان.

بۇعان دەيىن كاسپي جاعالاۋىنان تابىلعان يتبالىق ولەكسەلەرىنىڭ سانى 533-كە جەتكەنى تۋرالى حابارلادىق. سونىمەن قاتار يحتيولوگ اسەل بايمۇقانوۆا يتبالىقتاردىڭ تەڭىزدىڭ سولتۇستىك اۋماعىنا ميگراتسياسى كەزىندە قىرىلعانىن ايتقان بولاتىن.

اۆتور

ساياگۇل جارىلقاسىن