كاسپيدە قىرىلعان يتبالىق سانى مىڭعا جۋىقتادى

اقتاۋ. KAZINFORM - ماڭعىستاۋداعى كاسپي تەڭىزىنىڭ جاعالاۋىندا ولگەن يتبالىقتار سانى ارتۋدا.

ماڭعىستاۋ وبلىستىق بالىق شارۋاشىلىعى ينسپەكسياسى باسشىسىنىڭ مىندەتىن اتقارۋشى اندرەي رۋتسكيدىڭ ايتۋىنشا، كەشەدەن بەرى اقتاۋداعى دەمالىس بازالارىنان باستاپ قۇرىق پورتىنا دەيىنگى ارالىقتان تاعى 115 يتبالىقتىڭ ولەكسەسى جينالعان. سونىمەن قىرىلعان يتبالىقتاردىڭ سانى - 850-گە جەتتى.

- ءبىزدىڭ ينسپەكتورلار، ەكولوگتار، اكىمدىك قىزمەتكەرلەرى مەن قوعامدىق بىرلەستىك وكىلدەرىنەن قۇرىلعان جۇمىس توبى جاعالاۋدى تەكسەرۋدە. ەندى تاۋ-تاستى جاعاجايلار قالدى. ولارعا كولىكپەن بارۋ مۇمكىن ەمەس، جاياۋ ارالايدى، - دەيدى ينسپەكسيا باسشىسى.

اندرەي رۋسكيدىڭ ايتۋىنشا، سوڭعى تابىلعان تەڭىز سۇتقورەكتىلەرىنەن سىناما الۋ مۇمكىن ەمەس. ماماندار يتبالىقتاردىڭ ءۇشىنشى، ءتورتىنشى ساتىدا بۇزىلىپ كەتكەنىن ايتقان. ال وتكەن ايدىڭ سوڭىندا الىنعان سىنامالاردىڭ قورىتىندىسى ءالى شىقپاعان.

بۇعان دەيىن كاسپي جاعالاۋىنان تابىلعان يتبالىق ولەكسەلەرىنىڭ سانى 533-كە جەتكەنى تۋرالى حابارلادىق. سونىمەن قاتار يحتيولوگ اسەل بايمۇقانوۆا يتبالىقتاردىڭ تەڭىزدىڭ سولتۇستىك اۋماعىنا ميگراتسياسى كەزىندە قىرىلعانىن ايتقان بولاتىن.

اۆتور

اياگوز ءىزباساروۆا