كاسپي تەڭىزىنىڭ سولتۇستىك بولىگىندە جاڭا ارال پايدا بولدى
اتىراۋ. KAZINFORM - تابيعات قورعاۋشىلار بىرنەشە جىلدان بەرى 5 ەلگە ورتاق كاسپي تەڭىزىنىڭ تايىزدانۋىنا بايلانىستى دابىل قاعىپ كەلەدى. ال جاقىندا سۋ ايدىنىنىڭ سولتۇسىك بولىگىنە تاياۋ ماڭنان ارالدىڭ پايدا بولعانى حابارلاندى.
بۇل تۋرالى رەسەي عىلىم اكادەمياسىنىڭ پ. شيرشوۆ اتىنداعى مۇحيتتانۋ ينستيتۋتىنىڭ عالىمدارى اقپارات تاراتتى.
عالىمدار ارنايى ەكسپەديتسياسى كەزىندە سولتۇستىك كاسپيدە جاڭا ارالدىڭ پايدا بولعانىنا كوز جەتكىزگەن. ول مالىي جەمچۋجنىي ارالىنان وڭتۇستىك-باتىسقا قاراي 30 شاقىرىم جەردە ورنالاسقان.
- كاسپي تەڭىزىندە جاڭا ارال تابىلدى. بۇل - كاسپي تەڭىزىنىڭ تايىزدانۋىنىڭ تاعى ءبىر دالەلى. 2024 -جىلدىڭ قاراشاسىندا تۇسىرىلگەن سپۋتنيكتىك سۋرەتتەردە «سرەدنيايا جەمچۋجنايا» جاعالاۋىنىڭ قۇرعاعانى بايقالدى. بۇل تەڭىز دەڭگەيىنىڭ تومەندەۋىنە بايلانىستى پايدا بولعان جاڭا جەر ەكەنىن راستاۋ ەندى عانا مۇمكىن بولدى، - دەلىنگەن اقپاراتتا.
ەكسپەديتسيا مۇشەلەرى اۋە كەمەسىمەن ارالعا جاقىنداعان. الايدا، سۋدىڭ تايازدىعى مەن قيىن اۋا رايىنىڭ قۇبىلۋىنا بايلانىستى قونا الماعان. ال، كۆادروكوپتەرمەن تۇسىرىلگەن فوتوسۋرەتتەردەن ارالدىڭ سۇلباسى انىق كورىنەدى.
- عالىمدار بيوگيدروحيميا، گيدروبيولوگيا جانە تەڭىزدەگى قۇبىلۋ ديناميكاسىنا قوسىمشا زەرتتەۋلەر جۇرگىزۋ ءۇشىن ارالدىڭ ماڭىنداعى سولتۇستىك تاياز سۋدا شامامەن 0,4 م تەرەڭدىكتە ارنايى ستانسيا قۇردى. قازىر ارال سۋدان ءسال عانا جوعارى كوتەرىلىپ تۇر. ءبىراق، تەڭىز سۋىنىڭ ەڭ تومەنگى دەڭگەيىندە ايتارلىقتاي بايقالادى. بەتكەيى قۇمدى جوتالارى بار تەگىس، ىلعالدى، ءارى جازىق. جاقىن ارادا عالىمدار جاڭا ارالدىڭ باستاپقى سيپاتتاماسىن اياقتاپ، ونىڭ گەوگرافيالىق اتاۋىنا قاتىستى ۇسىنىستارىن ورتاعا سالادى، - دەپ ناقتىلاعان رەسەيلىك عالىمدار.
عالىمداردىڭ پىكىرىنشە، كاسپي تەڭىزىنىڭ دەڭگەيى تومەندەي بەرسە، ارال اۋماعى كەڭەيۋى مۇمكىن. ءسويتىپ، سيرەك كەزدەسەتىن قۇستار مەن كاسپي يتبالىعىنىڭ جاڭا مەكەنىنە اينالاتىنا بولجام جاسالىپ وتىر.
ەسكە سالا كەتەلىك، بۇدان بۇرىن ساۋىردە كاسپي تەڭىزىنىڭ 3 ەلدەگى سەكتورىندا 15 داق انىقتالعانىن جازعان ەدىك.
اۆتور
جولداسبەك شوپەعۇل