كارىم ماسىموۆتىڭ ءۇيى ەكىنشى اۋكسيوندا دا ساتىلمادى

استانا. KAZINFORM – ۇ ق ك- ءنىڭ بۇرىنعى ءتوراعاسى كارىم ماسىموۆتىڭ ءباسساۋداعا قويىلعان استاناداعى ءزاۋلىم سارايى تاعى ساتىلمادى.

28-ناۋرىز كۇنى ساعات 10:00 دە جوسپارلانعان اۋكسيوندا باستاپقى باعاسى 1,8 ميلليارد تەڭگە بولاتىن ءۇيدى ساتىپ الۋعا ەشكىم نيەت بىلدىرمەدى.

ساتىپ الۋشىلاردان 117,9 ميلليون تەڭگە كولەمىندە كەپىلدىك جارنا تالاپ ەتىلگەن. الايدا كورسەتىلگەن تالاپتارعا سايكەس كەلەتىن ساتىپ الۋشى تابىلمادى.

ەستەرىڭىزدە بولسا، بۇل ءۇي 25-اقپاندا دا ءباسساۋداعا قويىلىپ، الايدا ساتىلماعان.

ءزاۋلىم سارايدىڭ ورنالاسقان مەكەنجايى - استانا قالاسى، نۇرا اۋدانى، قاراوتكەل شاعىن اۋدانى، ەرەيمەنتاۋ كوشەسى، 1-عيمارات. ءۇيدىڭ جالپى اۋدانى - 2877,7 شارشى مەتر، ونىڭ ىشىندە تۇرعىن اۋدانى 347,2 شارشى مەتردى قۇرايدى. سونىمەن قاتار، سارايدىڭ جالپى جەر اۋماعى 0,9475 گەكتار جانە قوسىمشا 0,2713 گەكتار جەر تەلىمىمەن تولىقتىرىلعان.

قۇجاتتارعا سايكەس، وندا رەسەپشن، باسسەيندەر، بيليارد بولمەسى، بىرنەشە كولىك تۇراعى جانە ونداعان بولمە بار.