كارتوپ باعاسىن وسىرگەندەرگە ايىپپۇل سالىندى

استانا. KAZINFORM - كارتوپقا ساۋدا ۇستەمەسىن اسىرعانى ءۇشىن 505 قاۋلى شىعارىلدى، ونىڭ 41 ىنە ايىپپۇل سالىندى. بۇل تۋرالى ساۋدا كوميتەتى حابارلادى.

- ساۋدا جانە ينتەگراتسيا مينيسترلىگى الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە ساۋدا ۇستەمەلەرىنىڭ نەگىزسىز وسۋىنە جول بەرمەۋ ماقساتىندا مەملەكەتتىك باقىلاۋدى جۇزەگە اسىرۋ جانە وڭىرلىك كوميسسيالارمەن ءوزارا ءىس-قيمىل جاساۋدا جۇيەلى جۇمىس جۇرگىزۋدە. جىل باسىنان مينيسترلىكتىڭ اۋماقتىق دەپارتامەنتتەرى 1585 اكىمشىلىك قاۋلى شىعاردى، ونىڭ 396 سى جالپى سوماسى 24 ميلليون تەڭگە ايىپپۇل، 1189 ى ەسكەرتۋ، - دەلىنگەن حابارلامادا.

اكىمشىلىك قۇقىق بۇزۋشىلىق تۋرالى كودەكسىنىڭ 204-4-بابىنىڭ تالاپتارىن ىسكە اسىرۋ شەڭبەرىندە (ءا م ا ت-قا  دان استام ساۋدا ۇستەمەسىنىڭ مولشەرىن اسىرعانى ءۇشىن) 1419 قاۋلى شىعارىلدى، ونىڭ ىشىندە 18,2 ميلليون تەڭگە سوماسىنا 239 ايىپپۇل سالىنىپ، 1180 ەسكەرتۋ جاسالدى.

- كارتوپ - الەۋمەتتىك ماڭىزى بار تاۋارلاردىڭ ماڭىزدى پوزيتسياسى. كارتوپقا ساۋدا ۇستەمەسىن اسىرعانى ءۇشىن 505 قاۋلى شىعارىلدى، ونىڭ 41 ىنە ايىپپۇل سالىندى. ايىپپۇل سوماسى 2,6 ميلليون تەڭگەدەن اسادى. ال 464 ىنە ەسكەرتۋ جاسالدى، - دەلىنگەن ساۋدا كوميتەتى حابارلاماسىندا.

بۇدان باسقا، دەلدالدىق سحەمالاردى تەرگەۋ جونىندەگى وڭىرلىك كوميسسيالاردىڭ قىزمەتى شەڭبەرىندە ءامات تاۋارلارىن جەتكىزۋ تىزبەكتەرى بويىنشا جىل باسىنان بەرى 303 وتىرىس ءوتتى.

- ونىڭ قورىتىندىسى بويىنشا ءونىمسىز دەلدالداردىڭ قاتىسۋىنىڭ 1164 جاعدايى جانە ساۋدا ۇستەمەلەرىنىڭ اسىپ كەتۋ فاكتىلەرى انىقتالدى. وسى جۇمىستىڭ ناتيجەسىندە 1079 اكىمشىلىك قاۋلى شىعارىلدى، ال 85 ءونىمسىز دەلدال جەتكىزۋ تىزبەگىنەن شىعارىلدى. مينيسترلىك ساۋدا سالاسىنداعى زاڭنامانىڭ ساقتالۋىنا مەملەكەتتىك باقىلاۋ ءىس-شارالار كەشەنىن ىسكە اسىرۋدى جالعاستىرا بەرەدى، - دەلىنگەن حابارلامادا.

ايتا كەتەلىك ەلدە قانداي ازىق-تۇلىك پەن قىزمەت ءتۇرىنىڭ باعاسى وزگەرگەنى جايلى جازعان ەدىك.