جاڭا ءتارتىپتى ق ر قارجى مينيسترلىگى مەملەكەتتىك كىرىستەر كوميتەتىنىڭ جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ ساراپشىسى داناگۇل ساعىنبەك ءتۇسىندىردى.
ونىڭ ايتۋىنشا، وزگەرىستەر قارجى ءمينيسترىنىڭ № 718 بۇيرىعىندا قاراستىرىلعان. جاڭا تالاپ كاسىپكەرلىك قىزمەتكە ارنالماعان جەكە بانك شوتتارىنا قاتىستى. ەگەر ازاماتتىڭ شوتىنا قاتارىنان ءۇش اي بويى 100 نەمەسە ودان دا كوپ ادامنان اقشا ءتۇسىپ، اۋدارىمداردىڭ جالپى سوماسى 360 ايلىق ەسەپتىك كورسەتكىشتەن (ا ە ك) اسسا، بانك بۇل تۋرالى سالىق ورگاندارىنا مالىمەت بەرەدى.
— بۇعان دەيىن سالىق ورگاندارىنىڭ باقىلاۋىنا جالپى سوماسى 1 ميلليون 20 مىڭ تەڭگەدەن اساتىن ءموبيلدى اۋدارىمدار ىلىنەتىن. ەندى بۇل شەك 1 ميلليون 557 مىڭ تەڭگەگە دەيىن كوتەرىلدى، ياعني جاڭا تالاپ بويىنشا اۋدارىمداردىڭ جالپى سوماسى وسى مولشەردەن اسۋى ءتيىس، — دەپ ءتۇسىندىردى داناگۇل ساعىنبەك.
ماماننىڭ تۇسىندىرۋىنشە، اتالعان ءۇش تالاپتىڭ بارلىعى ءبىر مەزگىلدە ورىندالۋى ءتيىس، ياعني اۋدارىمدار قاتارىنان ءۇش اي ىشىندە كەمىندە 100 ءتۇرلى ادامنان ءتۇسىپ، ولاردىڭ جالپى سوماسى بەلگىلەنگەن شەكتەن اسقان جاعدايدا عانا ەكىنشى دەڭگەيلى بانكتەر ءتيىستى اقپاراتتى مەملەكەتتىك كىرىستەر ورگاندارىنا جولدايدى.
سالىق ورگاندارى بانك ۇسىنعان مالىمەتتەردى العاننان كەيىن تەكسەرۋ جۇمىستارىن ءۇش كەزەڭ بويىنشا جۇرگىزەدى.
— العاشقى كەزەڭدە ازاماتقا اقپاراتتىق حابارلاما جىبەرىلەدى. وندا سالىق ورگاندارىنىڭ نازارىن اۋدارعان جاعدايلار تۋرالى مالىمەت بەرىلەدى. مۇنداي حابارلاماعا جاۋاپ بەرۋ مىندەتتى ەمەس. ەكىنشى كەزەڭدە كامەرالدىق باقىلاۋ جۇرگىزىلەدى. ەگەر ازامات تاپسىرعان سالىق ەسەپتىلىگىنەن سايكەسسىزدىكتەر انىقتالسا، وعان ءتيىستى حابارلاما جولدانادى. بۇل جاعدايدا ازامات سالىق ەسەپتىلىگىن تاپسىرۋى نەمەسە انىقتالعان سايكەسسىزدىكتەرمەن كەلىسپەسە، تۇسىنىكتەمە بەرۋى قاجەت. ءۇشىنشى كەزەڭ سالىقتىق تەكسەرۋدى قامتيدى. مۇنداي تەكسەرۋ سالىق ورگانىنىڭ ءتيىستى شەشىمى بولعان جاعدايدا عانا تاعايىندالادى، — دەدى سپيكەر.
داناگۇل ساعىنبەكتىڭ مالىمەتىنشە، ءبىرىنشى جانە ەكىنشى توقساننىڭ قورىتىندىسى بويىنشا ازاماتتارعا 274318 push-حابارلاما جىبەرىلگەن. سونىڭ ناتيجەسىندە 55133 ادام جەكە كاسىپكەر نەمەسە ءوزىن- ءوزى جۇمىسپەن قامتيتىن تۇلعا رەتىندە تىركەلگەن.
سونداي-اق كوميتەت وكىلى حابارلاما العان ازاماتتار ءتيىستى كىرىستەرىن وزدەرىنىڭ مارتەبەسى مەن قولداناتىن سالىق رەجيمىنە سايكەس سالىق ەسەپتىلىگىندە كورسەتۋى قاجەت ەكەنىن اتاپ ءوتتى.
ايتا كەتەيىك، بۇعان دەيىن سالىق ورگاندارى موبيلدى اۋدارىمداردى باقىلاۋ كەزىندە ازاماتتاردىڭ جەكە اۋدارىمدارى مەن كاسىپكەرلىك قىزمەتتەن تۇسكەن كىرىستەردى قالاي اجىراتاتىنىن تۇسىندىرگەن بولاتىن.