كانۆون-2024: ح و ك پرەزيدەنتى وليمپيادا مەدالدارىنىڭ ديزاينىن جاساعان جىگىتتى ماراپاتتادى
سەۋل. KAZINFORM - وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنىڭ جەڭىمپازدارى مەن جۇلدەگەرلەرىنە بەرىلەتىن مەدالدار جيىنتىعىنىڭ ديزاينى بويىنشا بايقاۋدا جەڭىمپاز اتانعان برازيليالىق ازاماتقا ح و ك پرەزيدەنتى توماس باح ەستەلىك مەدالدار جيناعىن تابىس ەتتى.
بۇل تۋرالى گانگۆون-2024 جاس وسپىرىمدەر قىسقى وليمپيادا ويىندارىن ۇيىمداستىرۋ كوميتەتى رەسمي تۇردە جاريالادى.
ايتا كەتەيىك، وسىعان دەيىن جاس وسپىرىمدەر اراسىنداعى IV قىسقى وليمپيادا ويىندارىنىڭ جۇلدەگەرلەرىنە بەرىلەتىن مەدالدىڭ اتاۋى - «جارقىراعان بولاشاق» ەكەنىن، سونداي-اق، مەدال ديزايىنىن كىمنىڭ جەڭىپ العانىن جازعان بولاتىنبىز.
وليمپيادا مەدالىنىڭ ديزاينىن جاساۋعا ارنالعان بايقاۋعا 120 مەملەكەتتەن 3000 نان استام ۇمىتكەر قاتىسقانى، سولاردىڭ اراسىنان تەك 27 جاستاعى برازيليا ازاماتى دانتە اكيرا ۋۆايدىڭ تۋىندىسى ۇزدىك دەپ تانىلعانى بەلگىلى بولدى.
بۇگىن كانۆون قالاسىندا حالىقارالىق وليمپيادا كوميتەتىنىڭ (ح و ك) پرەزيدەنتى توماس باح التىن، كۇمىس جانە قولا مەدالداردىڭ ەستەلىك جيناعىن تابىس ەتتى. ح و ك پرەزيدەنتى ۋۆايدى «جارقىن بولاشاق» دەگەن اتپەن بايقاۋعا قوسقان جۇمىسى ءۇشىن العىسىن ءبىلدىردى.
«مەدال كەرەمەت! ول ناعىز وليمپيادالىق سپورت ءتۇرىن جانە وليمپيادالىق قۇندىلىقتاردى ديزاينعا ابستراكتىلى تۇردە اۋدارادى. مەن بۇعان وتە قۋانىشتىمىن جانە سپورتشىلاردىڭ تەك مەدال جەڭىپ العانىنا عانا ەمەس، سونداي-اق شابىتتاندىراتىن جانە كەرەمەت مەدالدى جەڭىپ العانىنا دا قاتتى قۋاناتىنىنا سەنىمدىمىن»، - دەدى ح و ك پرەزيدەنتى.
ءوز كەزەگىندە «وسى مەدالدار جيىنتىعىن ح و ك پرەزيدەنتىنەن الۋ - كەرەمەت ءسات! مەن ءۇشىن قۇرمەت، بۇل مەن ءۇشىن وتە ەرەكشە ءسات»، - دەدى ۋۆاي.
ەسكە سالا كەتەيىك، IV قىسقى جاس وسپىرىمدەر وليمپياداسى بيىل 19- قاڭتار مەن 1- اقپان ارالىعىندا وڭتۇستىك كورەيانىڭ كانۆون قالاسىندا وتەدى.
اۆتور كۇنسۇلتان وتارباي