كامچاتكادا سوڭعى ءبىر تاۋلىكتە 120 عا جۋىق جەر استى دۇمپۋلەرى تىركەلدى

استانا. قازاقپارات - 30-شىلدەدە بولعان جويقىن جەر سىلكىنىسىنەن كەيىنگى ءبىر تاۋلىكتە كامچاتكادا ماگنيتۋداسى 3,5 تەن 6,7 گە دەيىن جەتەتىن شامامەن 120 افتەرشوك تىركەلدى، دەپ حابارلايدى ت ا س س.

رەسەيدىڭ كامچاتكا ولكەسى بويىنشا توتەنشە جاعدايلار جونىندەگى باس باسقارماسىنىڭ مالىمەتىنشە، جەرگىلىكتى ەلدى مەكەندەردە كەيبىر دۇمپۋلەر 5 بالعا دەيىن سەزىلگەن.

- سوڭعى تاۋلىكتە 120 افتەرشوك تىركەلدى. ولاردىڭ ماگنيتۋداسى 3,5 پەن 6,7 ارالىعىندا. ەلدى مەكەندەردە كەيبىرى 2 دەن 5 بالعا دەيىنگى كۇشپەن سەزىلدى، - دەلىنگەن ۆەدومستۆو حابارلاماسىندا.

سەيسمولوگتاردىڭ ايتۋىنشا، وڭىردەگى سەيسميكالىق بەلسەندىلىك بىرتىندەپ تومەندەپ كەلەدى، الايدا ازىرگە جوعارى دەڭگەيدە قالىپ وتىر. مامانداردىڭ بولجامىنشا، 30-شىلدەدەگى ماگنيتۋداسى 8,8 جەر سىلكىنىسىنەن كەيىنگى افتەرشوكتار بىرنەشە ايعا دەيىن جالعاسۋى مۇمكىن.

قازىرگى تاڭدا پەتروپاۆلوۆسك- كامچاتسكي قالاسى مەن ەليزوۆو اۋدانىندا ۋاقىتشا ورنالاسۋ ءۇشىن ەكى قابىلداۋ پۋنكتى اشىلعان. 1-تامىز تاڭەرتەڭگى مالىمەت بويىنشا، وندا 190 ادام ۋاقىتشا تۇرىپ جاتىر. اتالعان ازاماتتارمەن رەسەي ت ج م-نىڭ پسيحولوگتارى جۇمىس جۇرگىزىپ جاتىر.

ەسكە سالا كەتەيىك، 30-شىلدە كۇنى كامچاتكا جاعالاۋىندا قۋاتتى جەر سىلكىنىسى بولدى. بۇل - 1952 -جىلدان بەرگى ەڭ كۇشتى سىلكىنىس رەتىندە تىركەلىپ وتىر. بيلىك وكىلدەرىنىڭ مالىمەتىنشە، ونىڭ ماگنيتۋداسى 8,8 گە جەتكەن.

اتالعان ءزىلزالا تىنىق مۇحيتىندا سۋناميدىڭ پايدا بولۋىنا سەبەپ بولدى. سۋنامي قاۋپىنە بايلانىستى جاپونيا، اقش جانە فيليپپين بيلىگى دابىل قاققان بولاتىن.