كامچاتكادا جوعالعان مي-8 تىكۇشاعى اپاتقا ۇشىرادى
13:53, 01 - قىركۇيەك 2024
استانا. KAZINFORM - كامچاتكادا ءبىر كۇن بۇرىن جوعالىپ كەتكەن مي-8 تىكۇشاعى اپاتقا ۇشىرادى. قۇتقارۋشىلار ونىڭ سىنىقتارىن اۋەدەن تاپقان.
بۇل تۋرالى تاسس اگەنتتىگىنە رەسەي توتەنشە جاعدايلار مينيسترلىگىنىڭ باسپا ءسوز قىزمەتى حابارلادى.
«جوعالعان تىكۇشاقتىڭ قالدىقتارى اۋەدەن تابىلدى. ول 900 م بيىكتىكتە، سوڭعى رەت بايلانىسقا شىققان جەرىنە جاقىن ورنالاسقان»، - دەپ حابارلادى باسپا ءسوز قىزمەتى.
بۇعان دەيىن حابارلانعانداي، كەشە كامچاتكادا «ۆيتياز- اەرو» اۋە كومپانياسىنىڭ مي-8 تىكۇشاعى جوعالىپ كەتتى. اۋە كولىگى فەدەرالدى اگەنتتىگىنىڭ مالىمەتى بويىنشا، بورتتا بارلىعى 22 ادام: 3 ەكيپاج مۇشەسى جانە 19 جولاۋشى بولعان.