كامالا حارريس پرەزيدەنتتىككە كانديدات بولۋى ءۇشىن داۋىس جيناۋى كەرەك

استانا. KAZINFORM- ا ق ش- تىڭ 46-پرەزيدەنتى دجو بايدەن كوپشىلىك كۇتپەگەن مالىمدەمە جاسادى. 81 جاستاعى دەموكرات قاراشادا وتەتىن پرەزيدەنتتىك سايلاۋعا قاتىسپايتىنىن جاريالادى. مۇنداي شەشىم قابىلداۋعا نە تۇرتكى بولدى؟

اق ءۇي باسشىسى دجو بايدەن الەۋمەتتىك جەلىدەگى رەسمي پاراقشاسىندا سايلاۋالدى باعدارلاماسىنىڭ توقتايتىنىن جانە پرەزيدەنتتىك سايلاۋعا قاتىسپايتىنىن حابارلادى. ءوز مالىمدەمەسىندە دەموكرات امەريكا حالقىنا العىس ءبىلدىرىپ، قايتا سايلانۋعا نيەتتى بولعانىمەن، پارتيالاستارى مەن ەلىنىڭ مۇددەسى ءۇشىن وسىنداي شەشىمدى قابىلداۋعا تۋرا كەلگەنىن مالىمدەدى.

ايتا كەتەيىك بايدەن 1968 -جىلى پرەزيدەنت ليندون دجونسوننان كەيىنگى قايتا سايلانۋدان باس تارتقان العاشقى پرەزيدەنت. جالپى ءومىرىنىڭ 52 جىلىن ساياساتقا ارناعان دەموكراتتىڭ سايلاۋعا نەبارى 107 كۇن قالعاندا وسىنداي شەشىم قابىلداپ وتىر؟ ونىڭ ءتۇرلى سەبەبى بار.

بىرىنشىدەن، بايدەننىڭ 81 دەن اسۋى ءبىرازدان بەرى سايلاۋشىلاردىڭ كوكەيىندە جۇرگەن وزەكتى ماسەلەنىڭ بىرىنە اينالدى. ەكىنشىدەن بايدەننىڭ ترامپقا قارسى توتەپ بەرە الاتىنا كۇمان كەلتىرەتىندەردىڭ سانى ماۋسىمنىڭ سوڭىندا وتكەن تەلەدەباتتان كەيىن ارتا ءتۇستى. سونىمەن قاتار 13-شىلدەدە ترامپتىڭ ومىرىنە جاسالعان قاستاندىق ارەكەتىنەن كەيىن ونىڭ ساۋالنامالارداعى كورسەتكىشتەرىنە تىكەلەي اسەر ەتتى. وسىلايشا اق ءۇي باسشىسىنىڭ سايلاۋعا قاتىسۋىن قايتا قاراستىرۋ كەرەكتىگىن تەك داۋىس بەرۋشىلەر عانا ەمەس، سونىمەن بىرگە پارتيا وكىلدەرى دە ايتىپ كەلدى.

بايدەن كەتسە ونىڭ ورنىنا پرەزيدەنتتىك سايلاۋعا كىم تۇسەدى، ترامپقا قارسى كىم تۇرادى دەگەن سۇراق تۋىندايدى. بايدەنىنڭ ءوزى ۆيتسە پرەزيدەنتى كامالا حاريستى قولدايتىنىن مالىمدەگەنىمەن ونىڭ دەموكراتتار اتىنان رەسمي تۇردە ۇمىتكەر اتانۋى ءۇشىن پارتيالاستارىنىڭ داۋىسىن جيناۋ كەرەك. ال ول تامىز ايىندا وتەتىن دەموكراتتاردىڭ ۇلتتىق كونۆەنتسياسىندا بولادى دەپ كۇتىلۋدە. ەگەر كامالا حارريستىڭ كانديداتۋراسى تاڭدالسا، ول پرەزيدەنتتىك سايلاۋعا تۇسەتىن العاشقى قارا ءناسىلدى ايەل اتانادى. ال دونالد ترامپ ءحارريستى جەڭۋ بايدەنگە قاراعاندا الدەقايدا جەڭىل بولادى دەپ حابارلادى.

24.kz