كامالا حارريس دەگەن كىم؟

استانا. قازاقپارات- كامالا حارريستى قولداۋ رەيتينگى دجو بايدەندىكىندەي تومەن. مۇنى الەۋمەتتىك ساۋالناما ناتيجەلەرى كورسەتىپ وتىر. ال ساراپشىلار 4 ايدان از ۋاقىت قالعان پرەزيدەنت سايلاۋىنا دەموكراتيالىق پارتيا اتىنان ۆيتسە- پرەزيدەنتتەن بولەك باسقا ۇمىتكەرلەر دە سىنعا ءتۇسۋى مۇمكىن دەيدى.

ولاردىڭ قاتارىندا كىم بار؟ جالپى حارريس حانىم دەگەن كىم؟

كامالا حارريس 1964 -جىلى ەميگرانتتار وتباسىندا دۇنيەگە كەلگەن. اكەسى ا ق ش- قا يامايكادان، اناسى ءۇندىستاننان كوشىپ كەلگەن. 2016 -جىلى سەناتقا سايلانعان. وعان دەيىن كونگرەستىڭ جوعارى پالاتاسىندا تەك ءبىر عانا قارا ءناسىلدى ايەل بولعان ەكەن. حارريس سەناتتىڭ 4 ءتۇرلى كوميتەتىندە جۇمىس ىستەگەن. 2021-جىلدان بەرى ۆيتسە- پرەزيدەنت قىزمەتىن اتقارىپ كەلەدى. 3 جارىم جىل ىشىندە ونداعان شەتەلدىك ساپار بارىسىندا 150-دەن اسا ەلدىڭ باسشىلارىمەن كەزدەسىپ، سىرتقى ساياساتتاعى بەدەلى دە ارتقان.

ونىڭ ۆيتسە- پرەزيدەنتتىگى كەزىندە جۇمىسسىزدىق دەڭگەيى تومەندەدى، ءدارى-دارمەك ارزانداپ، ستۋدەنتتەردىڭ بەرەشەگى كەشىرىلدى. ساراپشىلار ءوزىنىڭ سايلاۋالدى ناۋقانىندا حارريس حانىم وسى جەتىستىكتەرىن العا تارتۋى مۇمكىن دەيدى.

ەليزابەت ۋوررەن، سەناتور: «مەن كامالا حارريستىڭ كانديداتۋراسىن قولدايمىن. ول مىقتى ساياساتكەر. بۇرىنعى پروكۋرور رەتىندە تاجىريبەسى مول. كەيىنگى 4 جىلدا ونىڭ اتقارعان ەڭبەگى زور. جۇمىسسىزدار سانى ازايدى. مۇنى ول از ۋاقىتتا جاساي الدى. كامالا حارريس پارتيامىزدىڭ وركەندەۋىنە ءوز ۇلەسىن قوسىپ، دونالد ترامپتى جەڭىپ شىعۋعا ابدەن لايىق دەپ سانايمىن».

ءبىراق ۆيتسە- پرەزيدەنتتىگى كەزىندە كامالا حارريستىڭ جۇمىسىنا قاتىستى سىن دا از بولمادى. اسىرەسە كوشى-قون ساياساتى جونىندەگى مالىمدەمەلەرى كوپشىلىكتىڭ كوڭىلىنەن شىقپادى. جاساندى تۇسىك ماسەلەسى بويىنشا دا باسى داۋعا قالعان ەدى. سايلاۋشىلار ونىڭ 5 جىل بۇرىنعى ساتسىزدىكتەرىن دە بەتىنە باسۋى مۇمكىن دەيدى ساراپشىلار.

2019 -جىلدىڭ كۇزىندە حارريس حانىم دەموكراتيالىق پارتيا اتىنان 2020-جىلعى پرەزيدەنت سايلاۋىنا قاتىسۋعا نيەت بىلدىرگەن. ءبىراق ونى قولداۋ رەيتينگى تومەن بولدى. ونىڭ سۇحباتتارىنا كوپ سايلاۋشىنىڭ كوڭىلى تولمادى. ويتكەنى ەلدى باسقارۋعا قاتىستى ناقتى كوزقاراسىن اشىپ ايتا الماعان. ونىڭ ۇستىنە حارريستىڭ ساياسي ناۋقانىنا اقشالاي اۋدارىم جاساعاندار دا از بولدى. سوندىقتان ول ءوز كانديداتۋراسىن الىپ تاستاپ، دجو بايدەندى قولدايتىنىن ايتقان.

قازىر كامالا حارريسكە قاتىستى حالىق پىكىرى قاق جارىلدى. بليتس «ول جەڭىسكە جەتسە، ەل تاريحىنداعى العاشقى قارا ءناسىلدى ايەل پرەزيدەنت بولادى. مەن بۇعان قارسى ەمەسپىن. قاراشادا وتەتىن سايلاۋعا دەموكراتتار اتىنان كامالا حارريس قاتىسسا ەكەن دەپ وتىرمىن. 2016-جىلى پرەزيدەنتتىككە ۇمىتكەر حيلاري كلينتون ۇلكەن جەتىستىككە جەتتى عوي. سوندىقتان ۆيتسە- پرەزيدەنت تە سايلاۋالدى ناۋقانىن دۇرىس جۇرگىزسە، جەڭىسكە جەتۋى ابدەن مۇمكىن.» «بايدەننەن گورى جاس ۇمىتكەردىڭ بولعانى دۇرىس. ءبىراق شىنى كەرەك، دەموكراتتارعا سەنىم قالمادى. كامالا حارريستىڭ كانديداتۋراسىن اسا قولدامايمىن. ءبىراق كىم بىلەدى؟ ول باسقا باعىت تاڭداسا، مۇمكىن ءبارى وزگەرەتىن دە شىعار.»

دجو بايدەن كامالا حارريستىڭ كانديداتۋراسىن ۇسىنعانىمەن، نەگىزى دەموكراتتار اتىنان پرەزيدەنت سايلاۋىنا رەسمي ۇمكىتكەر ءالى جوق. چيكاگودا تامىزدىڭ سوڭىنا بەلگىلەنگەن پارتيانىڭ سەزىندە داۋىس بەرۋ وتەدى. ۇمىتكەر سول كەزدە بەكىتىلۋى ءتيىس. ساراپشىلار تالاسقا وزگەلەردىڭ دە ءتۇسۋى عاجاپ ەمەس دەيدى. مۇمكىن دەگەن كانديداتتاردىڭ قاتارىندا ميچيگان شتاتىنىنىڭ گۋبەرناتورى، كاليفيورنيا شتاتىنىڭ گۋبەرناتورى مەن كولىك ءمينيسترىنىڭ ەسىمدەرى اتالىپ وتىر. سوندىقتان سايلاۋ الدىنداعى ساياسي دودا قىزا تۇسۋدە.

جۇلدىز اتاگەلديەۆا

24.kz