كامالا حارريس ۆاشينگتوندا سايلاۋ الدىندا نەگىزگى ءسوزىن سويلەدى

استانا. KAZINFORM - ا ق ش پرەزيدەنتتىگىنە ۇمىتكەر كامالا حارريس ءبىر اپتادان كەيىن وتەتىن سايلاۋ قارساڭىندا ۆاشينگتوندا مىڭداعان ادام الدىندا نەگىزگى ءسوز سويلەدى، دەپ حابارلايدى BBC.

«قايىرلى كەش، امەريكا! - دەدى ول ءسوزىنىڭ باسىندا.

«ءبىر اپتادان كەيىن ءسىزدىڭ ومىرىڭىزگە، وتباسىڭىزدىڭ ومىرىنە جانە ءبىز جاقسى كورەتىن وسى ەلدىڭ بولاشاعىنا تىكەلەي اسەر ەتەتىن شەشىم قابىلداۋعا مۇمكىندىگىڭىز بولادى»، - دەپ جالعاستىردى ول.

ونىڭ ايتۋىنشا، الداعى سايلاۋ - «ەكى پارتيا مەن ەكى ءتۇرلى كانديدات اراسىنداعى تاڭداۋ عانا ەمەس».

ميتينگ وتەتىن ورىن كەزدەيسوق تاڭدالعان جوق - ول اق ءۇيدىڭ جانىندا ورنالاسقان جانە ەلليپس ساياباعى دەپ تانىمال. 2021-جىلدىڭ 6-قاڭتارىندا بۇل جەردە ونىڭ سايلاۋداعى باسەكەلەسى رەسپۋبليكاشىل دونالد ترامپ ءوزىنىڭ جاقتاستارى الدىندا ءسوز سويلەپ، سودان كەيىن ولاردىڭ كەيبىرەۋلەرى كاپيتوليگە باسىپ كىردى.

حارريس ترامپتىڭ «ءتورت جىلعا جۋىق ۋاقىت بۇرىن ءدال وسى تۇرعانىن جانە جەڭىلىپ قالعانىن بىلە تۇرا، ەركىن جانە ءادىل سايلاۋدا حالىقتىڭ ەركىن جەڭۋ ءۇشىن كاپيتوليگە قارۋلى توبىر جىبەرگەنىن» ايتتى.

بۇعان دەيىن ا ق ش پرەزيدەنتتىگىنە كانديدات كامالا حارريس سارسەنبى كۇنى سايلاۋشىلارمەن كەزدەسۋدە قارسىلاسى دونالد ترامپتى فاشيست دەپ سانايسىز با دەگەن سۇراققا «ءيا» دەپ جاۋاپ بەردى.