كامالا حارريس - ا ق ش پرەزيدەنتتىگىنە رەسمي ۇمىتكەر

استانا. KAZINFORM - پرەزيدەنت دجو بايدەن پرەزيدەنت سايلاۋىنا تۇسۋدەن باس تارتقاننان كەيىن كوپ ۇزاماي ۆيتسە-پرەزيدەنت كامالا حارريس ونىڭ قولداۋىن قابىل الىپ، قاراشادا وتەتىن سايلاۋعا دەموكراتيالىق پارتيادان ۇمىتكەر بولاتىنىن مالىمدەدى، دەپ جازادى NBC News.

- پرەزيدەنتتىڭ قولداۋىنا يە بولعانىمدى ماقتان ەتەمىن جانە جەڭىسكە جەتۋ ءۇشىن بار كۇشىمدى سالامىن. سونداي-اق، دەموكراتيالىق پارتيانى جانە ەلىمىزدى بىرىكتىرۋ ءۇشىن، دونالد ترامپتى جانە ونىڭ «2025 جوبا» باعدارلاماسىن جەڭۋ ءۇشىن قولىمنان كەلگەننىڭ ءبارىن جاسايمىن، - دەدى كامالا حارريس.

كامالا ديەۆي حارريس 1964 -جىلى 20-قازاندا كاليفورنيا شتاتىنىڭ وكلەند قالاسىندا دۇنيەگە كەلگەن.

اكەسى - ءتۇبى يامايكالىق، ستەنفورد ۋنيۆەرسيتەتىندە ساباق بەرگەن، ال اناسى - ءۇندى ديپلوماتىنىڭ قىزى، قاتەرلى ىسىك اۋرۋىن زەرتتەۋشى بولعان.

ءسىڭلىسى مايا - مەملەكەتتىك ساياساتكەر. 2014 -جىلى ادۆوكات دۋگلاس ەمحوففقا تۇرمىسقا شىققان.

ك. حارريس گوۆارد ۋنيۆەرسيتەتىن (1986) جانە گاستينگستەگى كاليفورنيا ۋنيۆەرسيتەتىنىڭ زاڭ كوللەدجىن (1989) ءبىتىردى.

العاشقى ەڭبەك جولىن كاليفورنيا شتاتىنىڭ الامەدا وكرۋگىندە باستادى. 2003 -جىلى سان- فرانتسيسكو وكرۋگىنىڭ پروكۋرورى، ال 2011-2017 -جىلدارى كاليفورنيانىڭ باس پروكۋرورى بولىپ سايلاندى.

ك. حارريس 2020 -جىلى دەموكراتيالىق پارتيادان پرەزيدەنتتىككە ۇمىتكەر رەتىندە ۇسىنىلدى، ءبىراق پرايمەريزگە دەيىن جارىستان باس تارتتى، دج. بايدەن ونى ءوزىنىڭ سەرىكتەسى ەتىپ تاڭداپ، ولاردىڭ كانديداتۋراسى 2020 -جىلعى سايلاۋدا جەڭىسكە جەتتى.

2021 -جىلدان باستاپ پرەزيدەنت دجو بايدەن تۇسىنداعى ا ق ش-تىڭ قازىرگى ۆيتسە-پرەزيدەنتى. ۆيتسە-پرەزيدەنت رەتىندە ك. حارريس وڭتۇستىك شەكاراداعى كوشى-قون، داۋىس بەرۋ قۇقىعى جانە تۇسىك تاستاۋ سياقتى ماسەلەلەرمەن اينالىستى.

ول ترامپتىڭ قايتا سايلانۋى ايەلدەردىڭ تۇسىك جاساتۋعا قول جەتكىزۋىن ودان ءارى شەكتەيتىنىن ەسكەرتىپ، سايلاۋالدى ناۋقانعا بەلسەندى قاتىستى.

اۆتور
ەركەجان سماعۇلوۆا