ءدۇربىلجىن اۋدانىنىڭ ۇيىمداستىرۋشىسى، جەتەكشىسى، اۋداندىق مادەنيەت ءۇيىنىڭ باسشىسى بولىپ جۇمىس اتقارىپ جۇرگەن كادىرقان قيزات ۇلى اعامىز كىپ كىشكەنە قارا تورى 10 جاس شاماسىنداعى قىز بالانى دومبىراسىن كوتەرىپ ەرتىپ جۇردى، ەلدىڭ كوبى وزىنىڭ قىزىن ونەرگە باۋلىپ ەرتىپ جۇرگەن بولۋى كەرەك دەپ ويلادى.
ءار اۋداننىڭ جاۋاپتىلارى «كادەكە ەرتىپ جۇرگەن بالا ءوزىڭىزدىڭ قىزىڭىز با» دەگەندەرگە «جوق قىزىم ەمەس، وسى جولى تەرمە جارىسىنا ۇكىلەپ اكەپ وتىرعان جۇيرىگىم» دەپ جاۋاپ بەردى. «وي، مىنا بالا قايتىپ جۇلدەلى ورىن الادى دەيسىڭ» دەگەندەرگە ءوز ۋاعىندا كورەسىزدەر دەپ سەنىممەن جاۋاپ بەردى.
اقىندار ايتسى باستالىپ، كەزەك تەرمەشىلەر جارىسىنا كەلگەندە، كادىرقان اعام ايتقانداي الگى قارا دومالاق قىز بۇكىل ەلدىڭ تاڭدايىن قاقتىرىپ تاڭ قالدىردى، بەلگىلى اقىن بەردىقان اباي ۇلىنىڭ سوزىنە جازىلعان اسىلقان ناۋىرىزقان ۇلى اعامىزدىڭ «مەنىڭ اتام» اتتى تەرمەسىن ورىنداپ باس جۇلدەنى جەڭىپ الادى. ال سول قارا دومالاق قىز بۇگىنگى تاڭدا قازاقتىڭ داستۇرلى ءانىن، تەرمەسىن، تولعاۋلارىن، جىرلارىن جوعارى دەڭگەيدە ورىنداپ حالقىنىڭ سۇيىكتىسىنە اينالعان ونەر يەسى گۇلبارشىن قاناش قىزى بولاتىن. كادىرقان اعامىز ءوزىنىڭ الدىنداعى تۇلعالارعا شاكىرت بولا ءبىلدى، دوستارىنا قالجىڭنىڭ نە ەكەنىن تۇسىندىردى، وزىنەن كەيىنگە ۇستاز بولا ءبىلدى.
كادىرقان اعامىز ءدۇربىلجىن اۋدانىنىڭ مادەنيەت ۇيىندە جۇمىس جاساپ تۇرعاندا دۇنيەدەن وتكەن اقىن، جازۋشىلاردى ەسكە الۋ كەشتەرىن وتكىزسە، كوزى ءتىرى اقىن، جازۋشىلارعا ات مىنگىزىپ، شاپان جاۋىپ شىعارماشىلىق كەشتەرىن وتكىزىپ وتىردى. وزىنەن كەيىنگى جەتىلىپ كەلە جاتقان اقىن، جازۋشى ءىنى-قارىنداستارىنا ونەر جولىن اشىپ اۋدان كولەمىندە جىر ءمۇشايلارىن وتكىزىپ، تاڭداۋلى تۋىندىلاردان كىتاپ قۇراستىرىپ جاستاردىڭ شابىتىنا شابىت قوسىپ وتىردى.
سول ارقىلى كادىرقان اعام تاربيەلەگەن اقىن، جازۋشى، ءانشى، كۇيشى جاستار كۇنى بۇگىنگە دەيىن سول سارا جولمەن وركەندەپ كەلەدى.
وبىلىس، اۆتونوم كولەمىندە وتكەن اقىندار ايتىسىندا تارباعاتاي ايماعىنىڭ تۋىن وسى كادىرقان اعام كوتەرىپ ءجۇردى. اعامىزدىڭ جانىندا جۇرگەندە ءازىل ولەڭدەرىن ەستىپ ىشەك سىلەمىز قاتۋشى ەدى.
1999- جىلى اۆتونوميالى رايوندىق تۇڭعىش كەزەكتى اقىندار ايتىسىندا تارباعاتاي ايماعىنىڭ دومبىراشىسى بولىپ مەندە باردىم، سول كەزدە دومبىراشىلار باسەكەسىندە مەنىڭ العان ءنومىرىم جوعارى بولعان ەدى. كەشتە جاتاعىمدا وتىرعانىمدا ەسىك اشىلدى، «اينالايىن ءىنىم، قۇتتى بولسىن سەن مىقتى ورىندادىڭ، كاسىمباي اتامنىڭ ۇرپاعى وسىلاي بولۋى كەرەك قوي» دەپ قۇشاعىن اشىپ، باۋىرىنا باسقان ەدى. سول كەزدە اعانىڭ ىنىگە دەگەن مەيىرىمىنىڭ قانداي ەكەنىن تۇسىنگەن ەدىم.
وسىدان ءۇش جىلدىڭ الدىندا كاسىمباي اتامنىڭ قىزىل گۇل كۇيىنە اينالعان ساۋلە اپكەم دۇنيەدەن وتكەندە، جارىم كوڭىل بولىپ جۇرگەندە كادىرقان اعام اپكەنىڭ دۇنيەدەن وتكەندە قانداي كوڭىل كۇيدە بولاتىنىن مەن جاقسى بىلەم، بۇنداي جاعداي مەنىڭدە باسىمنان وتكەندە قاتتى قينالعام، دەپ ەدى. جانە ساۋلە اپكەمە جوقتاۋ ولەڭ جازىپ كوڭىلىمدى دە جۇباتقان بولاتىن.
ەندى مىنە سول اسىل اعامنىڭ ءوزى دۇنيەدەن ءوتىپ، جوقتاپ قينالىپ وتىرمىن.
ءسىزدىڭ ومىردەن وتكەنىڭىز وتباسىڭىزدىڭ عانا ەمەس، ءبىزدىڭ عانا ەمەس، كۇللى قازاقتىڭ قابىرعاسىن قايىستىردى. جانىڭىز ءجانناتتا، توپىراعىڭىز تورقا بولسىن ەسىل اعا!
اۆتورى: ارشىن كاسىمباي ۇلى