كابيرحانعا قاستاندىق جاسالعانى راس پا؟

استانا. KAZINFORM - شابىسىمەن تالاي جۇيرىكتى شاڭ قاپتىرعان كابيرحاننىڭ يەسى تىلەك مۇحانبەتقاليەۆ سوڭعى بايگەگە قاتىستى پىكىر ءبىلدىردى.

تىلەك مۇحانبەتقاليەۆتىڭ پىكىرى ق ر ۇلتتىق سپورت قاۋىمداستىعىنىڭ الەۋمەتتىك جەلىدەگى پاراقشاسىندا جاريالاندى. ات يەسىنىڭ ايتۋىنشا، كابيرحاننىڭ جارىسقا دايىندىعى تومەن بولعان.

«كابيرحان دايىن بولعان جوق، ياعني دايىندىعى تومەن بولدى. وزدەرىڭىز دە كورىپ وتىرسىزدار، ول شىققان كەزدە قاتتى تەرلەپ كەتتى. فينيشكە جەتەتىن كەزدە تىنىسى تارىلىپ، اۋا جەتپەي قالدى. ات امان، دەنساۋلىعى جاقسى. اتتى كوردىم، ول وعان قاتتى اسەر ەتكەن جوق، ويتكەنى ول «كروسسينگ» جاسادى. ەندى كابيرحان دەمالادى. ول بىلتىرعى ماۋسىمنان باستاپ، وسى كۇنگە دەيىن جارىستارعا قاتىستى. ول 11 اي بويى جارىستاردا ءجۇردى. ەندى، كەلەر جىلى باۋىرجان مىرزابايەۆتى وتىرعىزۋعا تىرىسامىز. جەڭىستەر ءالى الدا، كابيرحان نەبارى 4 جاستا. الدا 5، 6 جاس بار. اللا قالاسا، ءالى جانكۇيەرلەردى قۋانتامىز»، - دەيدى تىلەك مۇحانبەتقاليەۆ.

ەسكە سالايىق، بۇعان دەيىن كابيرحان الەم كۋبوگىندا جۇلدەلى ورىنعا ىلىگە الماعانى حابارلانعان بولاتىن. كابيرحان مارە سىزىعىن سوڭعى توپتاعى تۇلپارلارمەن قاتار كەسىپ، 9-ورىننان كورىنگەن ەدى.