كابۋلدا ازەربايجاننىڭ قولداۋىمەن كىلەم توقۋ وقۋ ورتالىعى اشىلدى
استانا. KAZINFORM - كابۋلدا ءداستۇرلى قولدانبالى ونەردى ساقتاۋ جانە ايەلدەردىڭ جۇمىسپەن قامتىلۋىن قولداۋعا باعىتتالعان كىلەم توقۋ وقۋ ورتالىعى سالتاناتتى تۇردە اشىلدى. جوبا ازەربايجان ۇكىمەتىنىڭ قولداۋىمەن جۇزەگە اسىرىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
رەسمي اشىلۋ راسىمىنە ازەربايجاننىڭ اۋعانستانداعى توتەنشە جانە وكىلەتتى ەلشىسى يلحام مامەدوۆ، اۋعانستان ۇكىمەتىنىڭ وكىلدەرى جانە يسلام ىنتىماقتاستىعى ۇيىمىنىڭ (ي ى ۇ) مۇشەلەرى قاتىستى.
ازەربايجان سىرتقى ىستەر مينيسترلىگىنىڭ مالىمەتىنشە، جوبا س ءى م جانىنداعى ازەربايجاننىڭ حالىقارالىق دامۋ اگەنتتىگى (AIDA) ارقىلى قارجىلاندىرىلىپ، ي ى ۇ- نىڭ اۋعانستانداعى وكىلدىگى جانە اۋعانستاننىڭ ەڭبەك جانە الەۋمەتتىك قامتاماسىز ەتۋ مينيسترلىگىمەن بىرلەسىپ جۇزەگە اسىرىلعان.
ورتالىقتا ءتورت شەبەرحانا بار. ولار 20 توقۋ ستانوگىمەن، قاجەتتى قۇرال- جابدىقتارمەن جانە ءبىر جىلعا جەتەتىن شيكىزات قورىمەن جابدىقتالعان. مۇندا ءبىر ۋاقىتتا 80-گە دەيىن ايەل ءبىلىم الىپ، وزىنە تابىس كوزى بولاتىن قولونەر داعدىلارىن مەڭگەرە الادى دەپ كۇتىلۋدە.
اۋعانستاننىڭ ەڭبەك ءمينيسترىنىڭ ورىنباسارى ءالحادج ماۋلاۆي ازەربايجان مەن يىۇ- عا اۋعان شەبەرلىك داستۇرلەرىن ساقتاۋعا جانە از قامتىلعان وتباسىلاردىڭ ءومىر ءسۇرۋ جاعدايىن جاقسارتۋعا قوسقان ۇلەسى ءۇشىن العىسىن ءبىلدىردى.
ي ى ۇ- نىڭ اۋعانستانداعى وكىلى مۇحاممەد سايد ءال- اياش بۇل جوبا تەك قولدانبالى ونەردى دامىتۋعا عانا ەمەس، ۇيىمعا مۇشە ەلدەردىڭ اراسىنداعى ىنتىماقتاستىقتى نىعايتۋعا دا ۇلەس قوساتىنىن اتاپ ءوتتى.
ءوز سوزىندە ەلشى يلحام مامەدوۆ ازەربايجاننىڭ اۋعانستاندا ءبىرقاتار گۋمانيتارلىق جانە ينفراقۇرىلىمدىق جوبالاردى جۇزەگە اسىرعانىن جانە ەلدى دامىتۋعا باعىتتالعان كۇش- جىگەردى قولداۋدى جالعاستىراتىنىن ايتتى. سونداي- اق، ول 2026 -جىلى وتەتىن ي ى ۇ سامميتىندە ازەربايجاننىڭ ءتوراعالىعى قارساڭىندا حالىقارالىق ىنتىماقتاستىقتىڭ ماڭىزدىلىعىن اتاپ ءوتتى.
قازاقستان پرەزيدەنتى قاسىم- جومارت توقايەۆ ءوزىنىڭ اۋعانستان بويىنشا ارنايى وكىلى ەركىن تۇقۇموۆقا اۋعانستانمەن ەڭ الدىمەن ساۋدا- ەكونوميكالىق جانە گۋمانيتارلىق سالالاردا ءتيىمدى ءوزارا ءىس- قيمىلدى جولعا قويۋدى تاپسىردى.