كانادادا اسكەري جاتتىعۋ كەزىندەگى ءورت بەس ادامنىڭ ءومىرىن قيدى

استانا. KAZINFORM — كانادانىڭ قارۋلى كۇشتەرى وتكەن ايدا اسكەري جاتتىعۋ كەزىندە اسكەريلەردى شارپىعان ورتتەن جاراقات العان بەسىنشى ساربازدىڭ كوز جۇمعانىن حابارلادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى NBC News-كە سىلتەمە جاساپ.

Фото: pinterest.com

قاتارداعى جاۋىنگەر ۋيليام دۋگلاس دال بيانكو جۇما كۇنى ونتاريو پروۆينتسياسىنداعى اۋرۋحانادا كوز جۇمدى. ول 17 -قازاندا البەرتا پروۆينتسياسىنداعى كانادانىڭ ۋەينرايت اسكەري بازاسىندا بولعان ورتتەن كەيىن وسى اۋرۋحانادا ەم قابىلداپ جاتقان.

ەدمونتون قالاسىنىڭ وڭتۇستىك- شىعىسىنداعى اسكەري بازادا پاتريتسيا حانشايىمنىڭ اتىنداعى كانادانىڭ جەڭىل جاياۋ اسكەر پولكىنىڭ 3-باتالونىنا قاراستى 84-كە جۋىق سارباز شابۋىلعا تويتارىس بەرۋ جاتتىعۋىن وتكىزىپ جاتقان. سول كەزدە دالاداعى ءورتتىڭ جالىنى قاتتى جەلدىڭ اسەرىنەن اسكەري قىزمەتشىلەرگە قاراي لاپ قويعان.

اسكەريلەردىڭ مالىمەتىنشە، قازىر 24 سارباز اۋرۋحانادا ەم قابىلداپ جاتىر. بۇعان دەيىن 19 بەن 26 جاس ارالىعىنداعى ءبىر سەرجانت پەن ءۇش قاتارداعى جاۋىنگەر كوز جۇمدى.

اسكەري پوليتسيا ءورتتىڭ شىعۋ سەبەپتەرىن انىقتاپ جاتىر. بۇدان بولەك ارنايى قۇرىلعان اسكەري كوميسسيا وقيعانىڭ ءمان-جايىن زەردەلەپ، وسىنداي قايعىلى جاعدايلاردىڭ الدىن الۋ جونىندە ۇسىنىستار ازىرلەيدى.

اسكەريلەردىڭ ايتۋىنشا، بۇل ءورت - كانادا تاريحىنداعى بەيبىت كەزەڭدە ەل اسكەرى تاپ بولعان ەڭ اۋىر قايعىلى وقيعالاردىڭ ءبىرى.

بۇعان دەيىن تۇركيادا S-70 تىكۇشاعى اپاتقا ۇشىراپ، ءتورت اسكەري قىزمەتكەر قازا تاپقانى حابارلانعان بولاتىن.