كاۋاپ يسىنە تۇنشىققان الماتى تۇرعىندارى اكىمگە شاعىمداندى
الماتى. KAZINFORM - ەربولات دوسايەۆ بوستاندىق اۋدانى تۇرعىندارىمەن كەزدەسۋ بارىسىندا الماتىلىقتىڭ كاسىپكەرگە قاتىستى شاعىمىنا جاۋاپ بەردى.
«مەن تورايعىروۆ كوشەسىندە ورنالاسقان كاۋاپحانادان 500 مەتر قاشىقتىقتا ورنالاسقان ۇيدە تۇرامىن، بولمەمنىڭ تەرەزەسىن اشۋ مۇمكىن ەمەس. سەبەبى، كاۋاپحانادان شىققان ءتۇتىن ءيىسى شىعادى. وتىنەمىن، قانداي دا ءبىر شارا قولدانىڭىزشى»، - دەدى اۋدان تۇرعىنىنىڭ ءبىرى.
شاھار باسشىسى وسىنداي شاعىمنىڭ باسقا اۋدانداردان دا تۇسكەنىن، قازىر قالا بويىنشا تەكسەرىس جۇرگىزىلىپ جاتقانىن جەتكىزدى.
«ءاربىر تەكسەرىستەن بۇرىن فاكتى قۇقىقتىق ستاتيستيكا كوميتەتىندە تىركەلەدى، ول جەردە كاسىپكەرلەرگە ارتىق قىسىم جاساپ جاتقان جوقپىز با، سول مۇقيات قارالادى. وتكەن جولى وسى ماسەلەنى ۇلتتىق ەكونوميكا مينيسترلىگى مەن ساۋدا جانە ينتەگراتسيا مينيسترلىگىنە ۇسىنعانىمدى ايتقان بولاتىنمىن. ۇسىنىس قابىلدانعاننان كەيىن ماسەلەنى جۇيەلى تۇردە شەشەمىز دەپ ۇمىتتەنەمىن. قاجەتتى جۇمىستاردى جۇرگىزەمىز»، - دەدى ەربولات دوسايەۆ.
سونداي-اق، قالا باسشىسى كاسىپكەرلىك باسقارماسىنا، اۋدان اكىمدىگىنە، سانيتارلىق- ەپيدەميولوگيالىق باقىلاۋ دەپارتامەنتىنە وسى ماسەلەنى باقىلاۋعا الۋدى تاپسىردى.
«زاڭ تالاپتارىنا سايكەس كەلەتىن جاقسى سۇزگىلەردى ورناتۋ كەرەك، وسى بويىنشا كاسىپكەرمەن سويلەسىڭىزدەر، ەگەر ورناتپاسا، ءتيىستى شارالار قابىلداڭىزدار»، - دەدى قالا اكىمى.
قالا باسشىسى بيزنەستىڭ كاسىپكەرلىك كودەكسپەن قورعالعانىن جانە ماسەلەنى شەشۋ ءۇشىن نورماتيۆتىك-قۇقىقتىق اكتىلەرگە وزگەرىستەر ەنگىزۋ قاجەت ەكەنىن تىلگە تيەك ەتتى.
«قالا پروكۋراتۋراسىن وبەكتيۆتى تەكسەرىس جۇرگىزۋگە شاقىرامىن، بەلگىلەنگەن نورمالار مەن ەرەجەلەردىڭ ساقتالماعانىن جانە نەگىزگى تالاپتاردىڭ ورىندالماي جاتقانىن كورىپ، سونىڭ نەگىزىندە شەشىم قابىلداۋعا بولادى، بارلىعى زاڭدى تۇردە بولۋى كەرەك»، - دەدى ەربولات دوسايەۆ.
اۆتور
الما مۇقانوۆا