جەزقازعاندا كولىك تىزگىنىندەگى بەس جاسار بالا بىرنەشە ادامدى قاعىپ كەتتى

جەزقازعان. KAZINFORM - جەزقازعاندا كولىك تىزگىندەگەن بەس جاسار بالا جول بويىنداعى ادامداردى قاعىپ كەتتى. اپات سالدارىنان 4 ادام زارداپ شەكتى.

وقيعا «گراند پالاس» مەيرامحاناسىنىڭ جانىندا بولعان.

اپات سالدارىنان ءتورت ادام زارداپ شەكتى.

بەلگىلى بولعانداي، كولىكتە وتىرعان بەس جاسار بالا قولمەن رەتتەلەتىن تەجەگىشتى جىبەرە سالعان، سودان كەيىن كولىك كەرى ءجۇرىپ، تروتۋاردا تۇرعان ادامداردى سوققان.

«فاكت پوليتسيادا تىركەلدى. ءارتۇرلى دەنە جاراقاتىن العان 4 جاياۋ جۇرگىنشى اۋرۋحاناعا جاتقىزىلدى. ءتيىستى ساراپتامالار تاعايىندالدى»، - دەپ حابارلادى ۇلىتاۋ وبلىستىق پ د باسپا ءسوز قىزمەتى.

ۇلىتاۋ وبلىسىنىڭ دەنساۋلىق ساقتاۋ باسقارماسى اۋرۋحاناعا 5 ادام تۇسكەنىن اتاپ ءوتتى. ولاردىڭ اراسىندا بالا دا بار.

«5 ادام زارداپ شەكتى. ءبارى ءتىرى. 1964 -جىلى تۋعان ناۋقاس تراۆماتولوگيا بولىمىنە جاتقىزىلدى. دياگنوز - جابىق كەۋدە جاراقاتى. سول جاق بۇيىردەگى 4-5-6-7 قابىرعالار ورنىنان جىلجىپ، سىنعان. وڭ جاق بۇيىرىندە دە 4-5-6 قابىرعالار جىلجىپ سىنعان. تراۆماتيكالىق شوك - 1 دەڭگەي. وڭ جاقتاعى پوستراۆماتيكالىق گەموتوراكس، سول جاقتا - پوستراۆماتيكالىق پنيەۆموتوراكس. قالعان 1985، 1959، 1962 -جىلى تۋعان ءۇش پاتسيەنتتىڭ بەل ومىرتقاسى، وڭ جاق توبىق بۋىنى جانە دەنەسى كوگەرگەن. بەسىنشى پاتسيەنت 2018 -جىلى تۋعان بالا امبۋلاتوريالىق ەمدەۋدە. دياگنوز - باستىڭ ءۇستىرت جاراقاتى. سول جاقتاعى قاس ايماعىندا كوگەرگەن جارا بار»، - دەپ اتاپ ءوتتى دەنساۋلىق ساقتاۋ باسقارماسىنىڭ باسپا ءسوز قىزمەتى.

بۇل بالانىڭ وقيعا كەزىندە كولىكتىڭ رۋلىندە بولعان-بولماعانى ازىرگە انىقتالىپ جاتىر.

اۆتور
ايزادا اگيلبايەۆا