ۆەدومستۆونىڭ تۇسىندىرۋىنشە، جۇمىس بەرۋشى قىزمەتكەردەن ەڭبەك ءتارتىبىن، ىشكى ءتارتىپ قاعيدالارىن ساقتاۋدى جانە قىزمەتتىك مىندەتتەرىن تيىسىنشە ورىنداۋدى تالاپ ەتە الادى. الايدا ءتارتىپ بۇزعانى ءۇشىن اقشالاي ايىپپۇل سالۋ ەڭبەك زاڭناماسىندا كوزدەلمەگەن.
ەڭبەك كودەكسىنىڭ 64-بابىنا سايكەس، قىزمەتكەر ەڭبەك ءتارتىبىن بۇزعان جاعدايدا وعان ەسكەرتۋ، سوگىس، قاتاڭ سوگىس بەرىلۋى نەمەسە زاڭدا كوزدەلگەن نەگىزدەر بويىنشا ەڭبەك شارتى بۇزىلۋى مۇمكىن.
- ەڭبەك كودەكسىندە جانە قازاقستان رەسپۋبليكاسىنىڭ زاڭدارىندا قاراستىرىلماعان باسقا تارتىپتىك جازالاردى قولدانۋعا جول بەرىلمەيدى، - دەپ ءتۇسىندىردى مينيسترلىك.
ماسەلەن، قىزمەتكەر جۇمىسقا 20 مينۋت كەشىگىپ كەلسە، جۇمىس بەرۋشى وعان ءوز بەتىنشە 10 مىڭ تەڭگە ايىپپۇل سالىپ، بۇل سومانى جالاقىسىنان ۇستاپ قالا المايدى.
مۇنداي جاعدايدا جۇمىس بەرۋشى زاڭدى نەگىز بولعان كەزدە عانا بەلگىلەنگەن تارتىپكە سايكەس تارتىپتىك جازا قولدانا الادى.
سونىمەن قاتار تارتىپتىك جازا تاعايىندار الدىندا قىزمەتكەردەن جازباشا تۇسىنىكتەمە تالاپ ەتىلۋى ءتيىس. جازا ءتۇرىن تاڭداعاندا ءتارتىپ بۇزۋشىلىقتىڭ سيپاتى، اۋىرلىعى جانە ونىڭ قانداي جاعدايدا جاسالعانى ەسكەرىلەدى.
مينيسترلىك زاڭسىز اقشالاي ايىپپۇل مەن زاڭدا كوزدەلگەن جالاقىدان ۇستالىم جاساۋدىڭ ايىرماشىلىعىن دا ءتۇسىندىردى.
ەڭبەك كودەكسىنىڭ 115-بابىندا جالاقىدان قانداي جاعدايلاردا ۇستالىم جاساۋعا بولاتىنى كورسەتىلگەن. ال كەيبىر وزگە جاعدايلاردا قىزمەتكەردىڭ جازباشا كەلىسىمى قاجەت.
ياعني جۇمىس بەرۋشى ەڭبەك ءتارتىبىن بۇزعانى ءۇشىن كوزدەلگەن جازالاردى اقشالاي ايىپپۇلمەن الماستىرا المايدى.
ۆەدومستۆو ەڭبەك زاڭناماسىن ساقتاۋ جۇمىس بەرۋشىلەر ءۇشىن دە، قىزمەتكەرلەر ءۇشىن دە مىندەتتى ەكەنىن ەسكە سالدى.
ايتا كەتەيىك، بۇعان دەيىن قازاقستاندا جۇمىس بەرۋشىنىڭ ەڭبەك شارتىندا كوزدەلگەنىمەن، قىزمەتكەرگە زاڭدا جوق اقشالاي ايىپپۇل سالۋعا قۇقىعى جوق ەكەنى تۇسىندىرىلگەن ەدى. ەڭبەك شارتىنداعى مۇنداي تالاپقا قول قويعان قىزمەتكەر دە زاڭسىز ۇستالعان جالاقىسىنا قاتىستى داۋ ايتۋ قۇقىعىنان ايىرىلمايدى.