وسى جۇمىستارعا بايلانىستى ەلوردانىڭ بىرنەشە كوشەسىندە ۋاقىتشا كولىك قوزعالىسىنا شەكتەۋ قويىلادى. بۇل تۋرالى قالا اكىمى جەڭىس قاسىمبەك الەۋمەتتىك جەلىدە جازدى.
اكىم Tarlan Astana جەڭىل رەلستى كولىك جەلىسىنىڭ قوسشى قالاسىنا قاراي باعىتتالعان ەكىنشى كەزەڭىنىڭ قۇرىلىسى قارقىندى ءجۇرىپ جاتقانىن، ونى كەلەسى جىلدىڭ سوڭىندا اياقتاۋ جوسپارلانىپ وتىرعانىن ايتتى.
- قازىرگى ۋاقىتتا قالا تۇرعىندارىنان Tarlan Astana جەلىسىنىڭ ەكىنشى كەزەڭىنىڭ قۇرىلىسىنا، ناقتىراق ايتقاندا، ايتماتوۆ، سىعاناق كوشەلەرى مەن تۇران داڭعىلىنداعى كولىك قوزعالىسىنا قويىلاتىن ۋاقىتشا شەكتەۋلەرگە قاتىستى سۇراقتار ءتۇسىپ جاتىر. ۋاقىتشا قولايسىزدىقتارعا تۇسىنىستىك تانىتىپ، جەڭىل رەلستى كولىك جوباسىنىڭ ىسكە اسۋىنا قولداۋ بىلدىرۋلەرىڭىزدى سۇرايمىن. قۇرىلىسى اياقتالعان سوڭ Tarlan Astana جولدارداعى كولىك جۇكتەمەسىن ەداۋىر ازايتىپ، وتكىزۋ قابىلەتىن ارتتىرۋعا جانە كەپتەلىس ماسەلەسىن شەشۋگە مۇمكىندىك بەرەدى. ءوز تاراپىمىزدان قۇرىلىس جۇمىسىن بارىنشا قىسقا مەرزىمدە ءارى ساپالى اياقتاۋ ءۇشىن بار كۇشىمىزدى سالامىز. ماسەلەن، بۇگىندە Tarlan Astana جەڭىل رەلستى كولىك جەلىسىنىڭ قوسشى قالاسىنا قاراي باعىتتالعان ەكىنشى كەزەڭىنىڭ قۇرىلىسى قارقىندى ءجۇرىپ جاتىر. كەلەسى جىلدىڭ سوڭىنا دەيىن بارلىق جۇمىستى اياقتاپ، وسى ۋچاسكەدە قوزعالىستى اشۋدى جوسپارلاپ وتىرمىز، - دەدى جەڭىس قاسىمبەك.
سونىمەن بىرگە ايتماتوۆ كوشەسى مەن تۇران داڭعىلى بويىنداعى جەلىنىڭ قۇرىلىسىن باستاۋ جوسپاردا بار. اكىمنىڭ ايتۋىنشا، قۇرىلىس كەزەڭىندە - وسى جىلدىڭ سوڭىنا دەيىن جانە كەلەسى جىلى سىعاناق، ايتماتوۆ كوشەلەرى مەن تۇران داڭعىلى بويىندا كولىك جۇرگىزۋشىلەرىنە ۋاقىتشا قولايسىزدىقتار تۋىندايدى.
- بۇل رەتتە، كولىك قوزعالىسىن قامتاماسىز ەتۋ ءۇشىن بار كۇشىمىزدى سالامىز، - دەدى قالا اكىمى.
جەڭىس قاسىمبەك سىعاناق كوشەسىنىڭ بويىندا ورنالاسقان 201-ستانسيادا ەكى دەڭگەيلى اۋىسىپ ءمىنۋ تورابىنىڭ قۇرىلىسى باستالعانىن اتاپ ءوتتى.
- بۇگىن Tarlan Astana جەڭىل رەلستى كولىك جەلىسىنىڭ ەكىنشى كەزەڭىندەگى 201، 202 جانە 204 ستانسيالارىنىڭ قۇرىلىس بارىسىمەن تانىستىم. سىعاناق كوشەسىنىڭ بويىندا ورنالاسقان 201-ستانسيادا ەكى دەڭگەيلى اۋىسىپ ءمىنۋ تورابىنىڭ قۇرىلىسى باستالدى. مۇندا 2 جانە 3-جەلىلەرى تۇيىسەدى. بۇل جولاۋشىلارعا كوشەگە شىقپاي-اق، ءبىر باعىتتان ەكىنشىسىنە جىلدام ءارى ىڭعايلى اۋىسىپ مىنۋىنە مۇمكىندىك جاسايدى. جوبانى ىسكە اسىرۋ قالانىڭ كولىك قاتىناسىن ەداۋىر جاقسارتىپ، تۇرعىنداردىڭ جىلدام قاتىناۋىنا جانە ەلوردادا زاماناۋي كولىك ينفراقۇرىلىمىن قالىپتاستىرۋعا مۇمكىندىك بەرەدى، - دەدى اكىم.
بۇگىنگە دەيىن جولاۋشىلار Tarlan Astana جەلىسىمەن 13,8 ميلليون رەت قاتىناعان.