بۇل ۆيدەونى «التىن- ەمەل» ۇلتتىق پاركى ءوزىنىڭ Instagram-داعى پاراقشاسىندا ءبولىستى. كادرلاردا قاراقۇيرىقتار سۋات باسىندا بۇركىتتىڭ جانىندا سابىرلى كۇيدە تۇر.
«تابيعاتتا ولاردىڭ كەزدەسۋى ادەتتە مۇلدەم باسقا سيپاتتا بولادى: ءبىرى - جىرتقىش، ەكىنشىسى - الەۋەتتى جەمتىك. الايدا بۇل جولى ءبارى وزگەشە بولدى. ءبىر-بىرىنە جاقىن جۇرگەنىنە قاراماستان، بۇركىت پەن قاراقۇيرىقتار وزدەرىن جايباراقات ۇستاپ، ءبىر-بىرىنە نازار اۋدارمايدى»، - دەلىنگەن جاريالانىمدا.
بۇركىت قاراقۇيرىققا شابۋىل جاساي ما؟
ۇلتتىق پارك مالىمەتىنشە، بۇركىت قاراقۇيرىقتىڭ تولدەرىنە اڭشىلىق جاساۋى مۇمكىن. سوندىقتان ماماندار سۋات باسىنداعى مۇنداي ەرەكشە كورشىلەستىكتىڭ سەبەبىن ءتۇسىندىردى.
«مۇنداي مىنەز-قۇلىققا اسەر ەتكەن فاكتورلاردىڭ ءبىرى - اپتاپ پەن سۋعا دەگەن مۇقتاجدىق بولۋى مۇمكىن. جازعى اپتاپتا سۋاتتار جابايى جانۋارلار ءۇشىن ەرەكشە ماڭىزعا يە بولادى، ال ءشول قىسقانداعى قاجەتتىلىك كەيدە ۇيرەنشىكتى ساقتىقتان دا باسىم تۇسەدى»، - دەپ اتاپ ءوتتى ۇلتتىق پارك وكىلدەرى.
ايتا كەتەيىك، ماۋسىم ايىنىڭ سوڭىندا كاتونقاراعاي ۇلتتىق پاركىندە فوتوتۇزاققا تاعى دا قار بارىسى وتباسى ءتۇسىپ قالدى. قىستا العاش رەت نىساناعا ىلىنگەن مارعاۋلار ايتارلىقتاي ءوسىپ قالعان، ەندى ولار تاۋ بەتكەيلەرىندە اناسىنىڭ سوڭىنان نىق باسىپ ەرىپ ءجۇر.