ءمينيستردىڭ ايتۋىنشا، جوبا مەملەكەت باسشىسىنىڭ كىتاپ وقۋ مادەنيەتىن دامىتۋ جانە زياتكەر ۇلت قالىپتاستىرۋ جونىندەگى شارالار تۋرالى جارلىعىن ىسكە اسىرۋ اياسىندا قولعا الىنعان.
نەگىزگى باعىتتاردىڭ ءبىرى – 1-قىركۇيەكتە باستالعان «جىلدىڭ 10 وقىرمانى» رەسپۋبليكالىق جوباسى. جوبا بۇكىل ەل اۋماعىندا وتكىزىلىپ، 195 اۋدان مەن 87 قالانى قامتيدى، - دەدى ارمان قىرىقبايەۆ.
قاتىسۋشىلار سەگىز سانات بويىنشا باق سىنايدى. جوباعا وقۋشىلار مەن ستۋدەنتتەر، پەداگوگتەر، مەملەكەتتىك قىزمەتشىلەر، عالىمدار، جازۋشىلار، جۋرناليستەر جانە باسقا دا نيەت بىلدىرۋشىلەر قاتىسا الادى.
قاتىسۋشىلار التى اي ىشىندە 15 كىتاپ وقىپ، كەيىن زياتكەرلىك سايىستاردا شىعارمالاردى قانشالىقتى مەڭگەرگەنىن كورسەتۋى كەرەك، - دەدى مينيستر.
ونىڭ سوزىنشە، مارافونعا قوعام تاراپىنان قىزىعۋشىلىق جوعارى. ەكى اپتا ىشىندە ارنايى پلاتفورماعا ميلليوننان استام ازامات تىركەلگەن.
جوبا قورىتىندىسى بويىنشا ءتورت مىڭعا جۋىق جەڭىمپاز اقشالاي سىيلىق الادى. ءار ءوڭىردىڭ ۇزدىك قاتىسۋشىلارى رەسپۋبليكالىق فينالدا كەزدەسەدى. سايىس سوڭىندا جىلدىڭ 10 وقىرمانى انىقتالادى. 23-ءساۋىر - ۇلتتىق كىتاپ كۇنىندە ولاردىڭ ءارقايسىسىنا 10 ميلليون تەڭگە كولەمىندە ارنايى سىيلىق تابىستالادى، - دەيدى ارمان قىرىقبايەۆ.
مارافون اياسىندا «پاراسات» اتتى ارنايى سانات تا قاراستىرىلعان. ونىڭ قاتىسۋشىلارى كوشباسشىلىق، باسقارۋ جانە مەملەكەتكە قىزمەت ەتۋ تۋرالى 15 كىتاپ وقىپ، وقىعاندارى جونىندە وي بولىسەدى. سونداي-اق جەكە ۇلگىسىمەن جاستاردىڭ كىتاپقا قىزىعۋشىلىعىن ارتتىرۋعا اتسالىسادى. بۇل ساناتتا اقشالاي سىيلىق قاراستىرىلماعان.
مينيستر ءوزى دە وسى سانات بويىنشا مارافونعا قوسىلعانىن ايتتى.
مەن دە «پاراسات» ساناتى بويىنشا مارافونعا قوسىلىپ، پلاتفورماعا تىركەلدىم. ارىپتەستەرىمدى - ۇكىمەت مۇشەلەرىن، ءماجىلىس دەپۋتاتتارىن، اكىمدەردى، كاسىپكەرلەر مەن قوعام قايراتكەرلەرىن مارافونعا قاتىسۋعا شاقىرامىن، - دەيدى ول.
«كىتاپ وقيتىن ۇلت» رەسپۋبليكالىق كىتاپ وقۋ مارافونىنا تىركەلە الاسىز. ول ءۇشىن reading-nation.kz سايتىنا كىرىپ، «قاتىسۋدى باستاۋ» باتىرماسىن باسىڭىز. قاجەتتى مالىمەتتەردى تولتىرىپ، ەلەكتروندىق پوشتا مەكەنجايى مەن قۇپيا ءسوزدى كورسەتىڭىز.