بريفينگكە ق ر مادەنيەت جانە اقپارات مينيسترلىگى ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى ايزادا قۇرمانوۆا، «كىتاپ وقيتىن ۇلت - چيتايۋشايا ناتسيا» قوعامدىق قورىنىڭ ءتوراعاسى باقىتجان تۇرلىبەكوۆ، قازاقستان جازۋشىلار وداعىنىڭ باسقارما ءتوراعاسى ءارى كوميسسيا ءتوراعاسى مەرەكە قۇلكەنوۆ، قۇرىلتاي دەپۋتاتتارى جاناربەك ءاشىمجان مەن سەرگەي پونوماريەۆ، كرەاتيۆتى يندۋستريالاردى دامىتۋ قورىنىڭ باسقارما ءتوراعاسى ەرلان كاناليموۆ جانە اباي اتىنداعى قاراعاندى وبلىستىق بالالار كىتاپحاناسىنىڭ وقىرماندارعا قىزمەت كورسەتۋ ءبولىمىنىڭ جەتەكشىسى مارينا پودگاينوۆا قاتىستى.
«جىلدىڭ 10 وقىرمانى» جوباسى 1-قىركۇيەكتە كىتاپ وقۋ مارافونىمەن باستالدى. جوبا حالىقتىڭ كىتاپ وقۋعا دەگەن قىزىعۋشىلىعىن ارتتىرىپ، بەلسەندى وقىرمان قاتارىن انىقتاۋدى كوزدەيدى.
بىلتىر مارافون ءۇش وڭىردە پيلوتتىق فورماتتا وتكىزىلىپ، وعان 190 مىڭعا جۋىق ادام قاتىستى. بيىل جوبا ەلىمىزدىڭ بارلىق ءوڭىرىن قامتىپ وتىر.
قاتىسۋشىلار جەتى سانات بويىنشا باق سىنايدى. جوباعا مەكتەپ وقۋشىلارى، كوللەدجدىڭ ءبىلىم الۋشىلارى، جوعارى وقۋ ورىندارىنىڭ ستۋدەنتتەرى، پەداگوگتەر، ءۇش بۋىن وكىلدەرى بار وتباسىلار، مەملەكەتتىك قىزمەتشىلەر جانە وزگە دە ازاماتتار قاتىسا الادى.
ساياساتكەرلەر مەن زيالى قاۋىم وكىلدەرى ءۇشىن «Parasat» جەكە باعىتى قاراستىرىلعان. مارافونعا قاتىسۋ تەگىن ءارى ەرىكتى نەگىزدە جۇرگىزىلەدى.
قاتىسۋشىلار ءۇشىن وتاندىق جانە الەم ادەبيەتىنىڭ 345 شىعارماسىنان تۇراتىن كىتاپتار ءتىزىمى ازىرلەندى. ءار قاتىسۋشى ءوز ساناتى بويىنشا 15 كىتاپ وقۋعا ءتيىس.
مارافون 2027 -جىلدىڭ ناۋرىزىنا دەيىن جالعاسىپ، 195 اۋدان مەن 87 قالانى قامتيدى. وبلىستىق ىرىكتەۋ قورىتىندىسىندا 4 مىڭعا جۋىق جۇلدەگەر انىقتالادى. ال 20 وڭىردەن 200 قاتىسۋشى رەسپۋبليكالىق فينالعا جولداما الادى.
فينالدا قاتىسۋشىلار اڭگىمەلەسۋدەن ءوتىپ، كوپشىلىك الدىندا ءسوز سويلەيدى. وسى كەزەڭدە ولاردىڭ وقىعان شىعارمالاردى قانشالىقتى مەڭگەرگەنى جانە ادەبي تۋىندىلاردى تالداي ءبىلۋى باعالانادى.
جوبا قورىتىندىسىندا كوميسسيا ەلىمىزدىڭ 10 ۇزدىك وقىرمانىن انىقتايدى. ولاردىڭ ءارقايسىسىنا «جىل وقىرمانى» اتاعى بەرىلىپ، 10 ميلليون تەڭگە كولەمىندە اقشالاي سىيلىق تابىستالادى.
ماراپاتتاۋ ءراسىمى 23-ءساۋىر - ۇلتتىق كىتاپ كۇنى رەسپۋبليكالىق وقىرماندار فورۋمى اياسىندا وتەدى.